Presidenti i vendit Ilir Meta ka reaguar mbrëmjen e sotme në lidhje me çështjen e bojkotit të Ligës Profesioniste të Futbollit.
Presidenti Meta i ka bërë thirrje qeverisë që të zgjidhë këtë çështje pasi kriza kushtetuese, institucionale dhe përfaqësuese po përshkallëzohet në të gjithë sektorët.
Reagimi i Metës:
Kriza e thellë kushtetuese, institucionale dhe përfaqësuese po përshkallëzohet në përmasa shqetësuese në të gjithë sektorët.
Futbolli shqiptar, krenaria jonë kombëtare, prej javësh ndodhet në një ngërç, për shkak të vendimit për shtyrjen e datës së fillimit të kampionatit të Kategorisë Superiore, sezoni 2020 / 2021, që duket se do të vazhdojë për një kohë të pacaktuar në mungesë të vullnetit për gjetjen e një zgjidhjeje të menjëhershme.
I njohur me kërkesat e drejta të Ligës Profesioniste të Futbollit, i bëj thirrje qeverisë që përmes dialogut, bashkëpunimit dhe mirëkuptimit të angazhohet për t’i rikthyer frymëmarrjen futbollit shqiptar që ka kohë që ndodhet në vështirësi dhe sot kërkon vëmendje e mbështetje nëpërmjet një baze të sigurt ligjore. 
https://fb.watch/Hme4c2daR/
Klubet e Superiores janë të vendosura të bojkotojnë kampionatin e ardhshëm, në rast se nga Kuvendi nuk miratohen 4 pikat e parashtruara prej tyre. Deri më tani ka pasur një përplasje ndërmjet qeverisë dhe Ligës Profesioniste dhe asnjë vendim nuk është marrë për të ardhmen e futbollit.
