Për herë të 27-të, deputetët e Kuvendit të Kosovës do të mblidhen sot në përpjekje për konstituimin e organit ligjvënës, por procesi vazhdon të mbetet i bllokuar për shkak të mungesës së konsensusit për zgjedhjen e kryetarit të Kuvendit.
Ngërçi kryesor lidhet me kandidaturën e Albulena Haxhiut, të propozuar nga Lëvizja Vetëvendosje.
Kjo kandidaturë refuzohet nga Partia Demokratike e Kosovës, Lidhja Demokratike dhe Aleanca për Ardhmërinë e Kosovës, të cilat e konsiderojnë Haxhiun si figurë përçarëse dhe jo të përshtatshme për të drejtuar një institucion që kërkon bashkëpunim politik.
Në tentativë për të çuar përpara procesin, kryesuesi Avni Dehari propozoi krijimin e një Komisioni Zgjedhor që do të mundësonte zhvillimin e një votimi të fshehtë për zgjedhjen e kryetarit. Megjithatë, as ky propozim nuk kaloi për shkak të mungesës së kuorumit në sallë.
Ndërkohë, Aleanca për Ardhmërinë e Kosovës i është drejtuar Gjykatës Kushtetuese për të kërkuar interpretim mbi mënyrën e votimit dhe kompetencat institucionale në këtë proces.
