Ndërsa dy autorët e Klisman dhe Arjon Hasaj ndodhen në burg për vrasjen e Ramazan Matajt, të tjera dëshmi tronditëse kanë dalë në dritë. Motra e Armela Hasajt ka treguar se Ramazan Mataj kishte përndjekur të motrën dhe madje kishte tentuar të hynte në banesën e saj. Ajo ka pohuar gjithashtu se 33-vjeçari kishte shpërndarë videot intime të tyre në fshat.
Sipas saj, ajo ndodhej në shtëpi kur Mataj tentoi të hynte brenda, ndërsa vetë ishte në katin e dytë dhe ai ndodhej poshtë.
Në lidhje me ekzekutimin e Ramazan Matajt, ajo ka treguar se ai kishte shqetësuar shpeshherë vëllezërit e tyre, Arjon dhe Klisman Hasaj. Ajo ka shtuar se, edhe pse fillimisht nuk e mendoi se vëllezërit e saj mund të kishin lidhje me ngjarjen, konflikti i mëparshëm me ta dhe shqetësimi që vëllai i kishte shprehur për këtë situatë e bëri të dyshonte.
Gjithashtu, ajo ka pohuar se Ramazan Mataj nuk e donte motrën e saj, pasi, po të kishte ndjenja të vërteta për të, do t’i kishte kërkuar dorën pas ndarjes nga bashkëshorti i parë.
Në një intervistë televizive ka folur edhe nëna e dy autorëve. Ajo është shprehur se ishte në dijeni të ngacmimeve që viktima i kishte bërë vajzës së saj, ndërsa shtoi se Armela nuk ishte e vetmja që ngacmohet nga Mataj, pasi ai ngacmonte edhe vajza të tjera.
Ajo ka rrëfyer se ndodhej në Tiranë, në momentin që kishte marrë vesh se djemtë e saj kishin ekzekutuar Ramazan Matajn. Nëna rrëfen se djemtë nuk i kishin treguar asgjë për planin e tyre dhe se Armela nuk kishte komunikim me nënën e saj prej 4 vitesh.
“Kisha 4 vite që isha në dijeni të ngacmimeve të viktimës ndaj vajzës time Amelës. Ai ngacmonte edhe vajzat e tjera. Ditën e ngjarjes ishim në Tiranë, kur morëm vesh se djemtë kishin ekzekutuar Ramazan Matajn. Djemtë nuk më treguan asgjë se çfarë kishin plan të bënin. Kam 4 vite që nuk kam komunikim me Armelën”, përfundoi ajo.
Në lidhje me ngjarjen, ka reaguar edhe babai i Armelës i cili tregoi se kishte parë mesazhe dhe video që viktima i dërgonte vajzës së tij dhe se bashkëfshatarët ishin në dijeni të tyre.
Kujtojmë se ngjarja ndodhi në 4 janar të këtij viti, kur dy vëllezërit Hasaj i kishin zënë pritë Matajt dhe e qëlluan për vdekje shumë pranë shtëpisë së tij.
