E gjithë Vlora u trondit nga vrasja e Kristian Breshanaj në agimin e ditës së Fitër Bajramit, teksa shkaqet e ngjarjes së rëndë vijojnë të jenë të paqarta për Policinë dhe Prokurorinë e Vlorës.
Pista kryesore ku u përqëndruan hetimet është eleminimi nga grupet mafioze të drogës.
Pas kthimit nga Belgjika, Breshanaj shpesh herë qëndronte në disa kafene, që ndodhet shumë afër një kompleksi banimi në zonën e “Ujit të Ftohtë” në Vlorë, ku është zona e influencës së një grupi kriminal në qytetin e Vlorës dhe nisur nga këto rrethana, Policia ka ngritur dyshime të bazuara në informacione operative, se anëtarët e grupit kriminal, mund të kenë dyshuar se prania e shpeshtë në këtë zonë e Breshanaj, çonte prej tij informacione tek krahu tjetër kundërshtar.
Së fundmi, detaje të reja janë zbuluar nga ekzekutimi i Breshanajt.
Sipas Report Tv, para se të ekzekutohej, ai ishte duke luajtur me letra në një lokal që ndodhet shumë pranë kompleksit “Oslo” në Vlorë, nën shoqërinë e disa prej miqve të tij, ku pasi kanë përfunduar lojën me letra, Breshanaj dhe një miku i tij, janë larguar të dy së bashku në këmbë drejt banesës së 28-vjeçarit.
Qëllimi për të cilin shoku e ka shoqëruar deri në momentin kur Breshanaj është qëlluar me armë, ka qenë marrja e një palë atleteve në shtëpinë e Kristianit, por kur të dy djemtë janë afruar në mesnatë pranë derës së shtëpisë, një person që ecte në këmbë është afruar pranë tyre dhe ka qëlluar fillimisht me një plumb drejt Kristjan Breshanaj.
Shoku që e shoqëronte, ka deklaruar në Polici se është trembur shumë kur Kristiani është rrëzuar në tokë dhe është larguar me vrap, duke mos arritur të shquajë asnjë karakteristikë për identifikimin e autorit.
Ky i fundit mësohet të jetë qëlluar dhe tre herë të tjera nga një distancë e afërt, duke e lënë të vdekur në vend.
Breshanaj, kishte vetëm tre muaj që ishte deportuar nga Belgjika, ndërkohë rezultonte i dënuar për drogë nga gjykata e Vlorës.
Ai vinte nga një familje e rregullt në Vlorë pasi babai i tij, Edmond Breshanaj, punon si mjek në spitalin e Vlorës, ndërsa nëna mësuese.
