Parlamenti do të mblidhet të enjtën për herë të parë, që pas shpërthimit të epidemisë COVID-19 në vendin tonë.
Gjatë seancës pritet të miratohen një sërë projektligjesh, lidhur me situatën që po kalon vendi ynë për shkak të COVID-19.
Për sigurinë e deputetëve janë marrë disa masa, duke filluar që nga kontrollet mjekësore dhe deri te mbajtja e distancës brenda sallës.
Fillimisht deputetëve do t’u matet temperature dhe më pas do të pajisen me maska dhe doreza nga stafi i Parlamentit.
Mësohet se ulja e deputetëve nuk do të bëhet si më parë, pasi do të shfrytëzohet edhe lozha apo vendi i mediave.
Përveç deputetëve, stafit të domosdoshëm dhe gardës, askush nuk do të jetë i pranishëm në sallë.
Numri i të infektuarve në rang kombëtar ka shkuar në 446, në mesin e të cilëve 23 viktima dhe 217 të shëruar.
Gjatë përditësimit të dhënave ditën e djeshme nga Ministria e Shëndetësisë, u shtuan 13 raste të reja nga 233 testime.
Në dy spitalet COVID aktualisht po marrin shërbim 49 pacientë.
Në spitalin Infektiv janë shtruar 41 pacientë, 6 prej të cilëve në terapi, ku 2 prej tyre të intubuar
Ndërsa në spitalin ‘Shefqet Ndroqi’, COVID 2, janë të shtruar 8 pacientë, 6 në terapi dhe 5 të intubuar.
Qyteti më i prekur është Tirana me 215 raste dhe ndjekin Shkodra me 57 e Durrësi me 41.
