Aeroporti “Nënë Tereza” dhe kompanitë e institucionet që operojnë në të, prej vitesh pushtojnë titujt e mediave dhe kjo rrallëherë është për mirë. Duke qenë aeroporti i vetëm në vend, duket se aeroporti i Rinasit është dhe subjekt i shkeljeve të shpeshta, shumë herë të paimagjinueshme dhe sërish, duket se asgjë nuk ndryshon.
Rasti i fundit është ai i kompanisë “Fly Ernest”, që vetëm pak kohë më parë në media u zbulua se kishte të njëjtët pronarë me famëkeqen “Belle Air”, që falimentoi në vitin 2013 duke grumbulluar një shumë prej 56 milionë eurosh në gjoba, që deri më tani as nuk përflitet se do të mund të paguhen ndonjëherë.
E njëjta situatë po ndodh dhe me “Fly Ernest”, që ndonëse ishte një skandal i paralajmëruar, askush nuk mori masa për ta frenuar. Pak ditë më parë, “gazetareforma.com” zbuloi se Aeroporti “Nënë Tereza” prej kohësh i dërgonte letra Autoritetit të Aviacionit Civil dhe Ministrisë së Infrastrukturës dhe Energjisë që e ka nën varësi këtë institucion, në lidhje me shkeljet e njëpasnjëshme të “Fly Ernest”, e megjithatë, këto thirrje u injoruan.
Skandali i radhës është sërish i pak ditëve më parë, kur KLSH zbuloi një seri shkeljesh që kapnin një vlerë prej 5 milionë eurosh, në adresë sërish të Aviacionit Civil. Sipas dokumentit të publikuar nga “Gazeta Shqip”, bëhet fjalë për 39 shkelje që lidhen me keqmenaxhimin e këtij institucioni e që variojnë nga fatura të palikuiduara, tek shpërblimet për stafin të pamiratuara nga ministria.
Në të gjitha rastet, personi përgjegjës rezulton të jetë po i njëjti: kreu i Aviacionit Civil, Krislen Keri. Keri u emërua në krye të këtij institucioni në vitin 2017, i sugjeruar nga ministrja e Infrastrukturës dhe Energjisë, Belinda Balluku. Por ai nuk është emër i panjohur për mediat. Më herët, ai ka qenë shef projektesh e shef kabineti në Ministrinë e Transportit në kohën e ministrit Edmond Haxhinasto dhe emri i tij është lakuar pas aksidentit tragjik të majit të vitit 2016, ku humbën jetën dy fëmijë, 3 dhe 5 vjeç.
Shkak për aksidentin u bë një barrierë mbrojtëse e ndërprerë në rrugën dytësore Golem-Kavajë, që i shërbente karburantit në pronësi të babait të Krislen Kerit, Pilo Keri. Emri i tij asokohe u përmend disa herë në media, e megjithatë asnjë masë apo hetim nuk u ndërmor për zyrtarin e Ministrisë së Transporteve, i cili vetëm një vit më vonë do të vihej në krye të Autoritetit të Aviacionit Civil.
Gjithashtu, Krislen Keri është përmendur si përgjegjës dhe në grabitjen spektakolare në aeroportin e Rinasit në prill të 2019, ku një grup grabitësish hynë në pistë dhe grabitën 10 milionë euro. Asokohe, në media u bë fakt i kryer shkarkimi i tij e madje dhe një ndjekje e mundshme penale lidhur me ngjarjen. Por megjithatë, shkarkimi i përfolur nuk u krye kurrë dhe me të kaluar zhurma e grabitjes, Keri vijoi i pashqetësuar punën e tij si drejtor i Aviacionit Civil.
Por tashmë, me dokumentat e publikuara nga KLSH, duket se jemi realisht tek “e treta e vërteta”. Lidhur me shkeljet e shumta dhe dëmin ekonomik në kurriz të buxhetit të shtetit, KLSH kërkon shkarkimin e Kerit dhe ndjekjen e tij penale. Megjithatë, mbetet për t’u parë nëse edhe kësaj radhe, ish-studenti i Oksfordit që po shijon mungesën e ligjit në Shqipëri do t’i ketë krahët e ngrohta, apo do t’i hyjë ndonjë gjemb në këmbë.
