Pas mbërritjes së COVID-19 në vendin tonë, qeveria mori masa drastike për parandalimin e përhapjes së Coronavirusit.
Këto masa kanë nxitur diskutime të shumta, teksa nuk kanë munguar as personat që kritikojnë qeverinë se ka marrë masa më të rrepta seç duhet.
Mirëpo, së fundmi mjeku Tualant Muka në një lidhje me Skype në emisionin “Opinion” deklaroi se nëse nuk do të merreshin masat, brenda një muaji Shqipëria do të shënonte plotë 55 mijë të infektuar, dhe në harkun kohor të 2-5 muajve mund të shkaktoheshin 18 mijë viktima.
“Nëse nuk do të merreshin masat do shkonin deri në 18 mijë të vdekur për 2-5 muaj. Varet edhe sa përqind e popullatës ka sëmundje kronike. Prandaj është shumë e rëndëishmë për të respektuar sa më shumë karantinën. Kur flasim për impaktin e masave; nëse nuk merrnim masa do kishim 55 mijë të infektuar vetëm brenda një muaji. Një person i infektuar nëse lihet i lirë mund të infektojë të paktën 240 persona në një muaj. Nëse merrnin masa mesatare, mund të shkonim në 865 raste në muaj. Karantina është mënyra më e mirë për ta parandaluar. Gjithçka është e bazuar në të dhënat e Kinës deri më sot,”-tha Muka në fjalën e tij.
Në rang botëror deri tani janë shënuar 7,953 viktima dhe janë regjistruar mbi 197 ,000 të infektuar në 163 shtete, ndërsa në vendin tonë deri tani ka humbur jetën 1 person dhe janë infektuar 55 të tjerë, teksa në Kosovë janë 19 persona të infektuar me COVID-19.
Autoritetet shëndetësore bëjnë thirrje që personat të cilët mund të kenë qenë të ekspozuar ndaj individëve të dyshuar për COVID-19, duhet që të vetëkarantinohen dhe të monitorojnë shëndetin e tyre për 14 ditë, që nga dita e fundit me kontaktin e mundshëm.
Po ashtu, ata duhet të kërkojnë mbikëqyrje të menjëhershme mjekësore, nëse paraqesin ndonjë nga simptomat, veçanërisht temperaturë, simptoma respiratore si kollë dhe vështirësi në frymëmarrje apo diarre menjëherë të kontaktojnë 127.
Të gjithë qytetarët rekomandohet që të shmangin daljet në publik dhe të qëndrojnë në shtëpi duke respektuar rregullat e higjenës.
