Luan Mjeshtri administrator i njësisë Administrative Ostren njëkohësisht vëllai i kryetares së bashkisë Bulqizë, Festime Mjeshtri.
Ditën e djeshme tre punonjës të njësisë administrative Ostren dhe të bashkisë Bulqizë kanë rënë në prangat e policisë së Dibrës, pasi pajisnin qytetarët me dokumente false.
Mes zyrtarëve të arrestuar është edhe vëllai i kryetares së bashkisë Bulqizë, Festime Mjeshtri.
Luan Mjeshtri, me detyrë administrator i njësisë Administrative Ostren njëkohësisht vëllai i kryetares së bashkisë Bulqizë, Festime Mjeshtri, është një prej të arrestuarve për shpërdorim detyre si pjesë e grupit që shiste vërtetime false të origjinës bullgare në Ostren të Bulqizës. Vërtetimi shitej kundrejt 100 mijë lekëve (të vjetra).
Duket se bashkia e Bulqizës është kthyer në një ‘çerdhe familjare’, ku kryetarja, Festime Mjeshtri, punëson familjarët e saj.
Nepotizmi në Shqipëri është shtrirë në administratën publike dhe në pushtetin lokal. Një investigim i “Inside Story” nxori se familjarët e kryebashkiakut të Kamzës Rakip Suli, i cili së fundi është marrë nën hetim nga SPAK, kanë shërbyer në administratë.
Bashkëshortja e tij në Agjencinë e Kadastrës ndërsa njëri prej djemve, specialist i nivelit të lartë në Korporatën Elektroenergjetike Shqiptare. Djali tjetër ka shërbyer në Drejtorinë e rëndësishme të Parandalimit të Pastrimit të Parave.
Tjetër rast ku një zyrtar ka të punësuar më shumë se një familjar është ai i kryebashkiakut të Pogradecit Ilir Xhakolli. Vajza e tij, ka punuar tek Autoritetit i Mbikëqyrjes Financiare. Ndërkohë, i biri, pranë Agjencisë së Blerjeve të Përqendruara.
Bashkëshortja e kryebashkiakut të Elbasanit, Gledian Llatja, Solora Jaupaj shërben në një post mjaft të rëndësishëm si drejtore kabineti e Ministrisë së Bujqësisë drejtuar nga Anila Denaj.
Bashkëshortja e Kryebashkiakut të Lezhës, Pjerin Ndreu, rezulton specialiste pranë Auditit në Ministrinë e Brendshme.
Bashkëshortja e ish-kryebashkiakut të Librazhdit, Kastriot Gurra, rezulton pranë Qendrës Kombëtare të Biznesit. Në kushtetutën e Shqipërisë, nuk ka një referencë të drejtpërdrejtë për ligjin e nepotizmit.
Megjithatë, kushtetuta e Shqipërisë përmban dispozita dhe vlera themelore që mbrojnë barazinë, drejtësinë dhe të drejtat e njeriut.
Për të luftuar praktikat e padrejta si nepotizmi, Shqipëria ka hartuar ligje dhe rregullore që kanë për qëllim të parandalojnë favorizimin e anëtarëve të familjes në proceset e punësimit në institucionet publike dhe në vendimmarrje të tjera.
Këto ligje janë pjesë e përpjekjeve për të siguruar barazi dhe meritokraci në vend.
Megjithatë, është e rëndësishme të theksohet se në kushtetutën dhe ligjet e Shqipërisë ka përcaktuar parimet e barazisë dhe drejtësisë që duhet të respektohen në çdo aspekt të jetës shoqërore dhe politike të vendit.
Por, duket se këto parime për kryebashkiaken e Bulqizës nuk funksionon e cila vendos vëllain administrator njësie, ky i fundit të bën me pasaportë bullgare vetëm për 100 mijë lekë./ Voxmedia
