Në Shqipëri ende lidhjet e gjakut në vendin e punës zënë një vend të rëndësishëm në organizimin e punëve administrative. Prej kohësh ka pasur raste ku dy ose më shumë familjarë kanë kryesuar në poste të rëndësishme publike. Por, së fundmi duket se rastet janë bërë më të shpeshta.
Në një insert të përgatitur nga Top Channel renditen emrat e kryebashkiakëve që kanë të punuar 1, 2 ose më shumë familjarë në administratën publike. Nepotizimi është ulur këmbëkryq në disa nga bashkitë e vendit tonë.
Kryebashkiaku i Kamzës, Rakip Suli
Familja Suli është e njohur për punën në administratë. Bashkëshortja e tij punon në Agjencinë e Kadastrës, ndërsa njëri prej djemve, specialist i nivelit të lartë në Korporatën Elektroenergjetike Shqiptare. Djali tjetër ka shërbyer në Drejtorinë e rëndësishme të Parandalimit të Pastrimit të Parave.
Kryebashkiaku i Pogradecit, Ilir Xhakolli
2 fëmijët e Ilir Xhakollit kanë punuar në poste të larta drejtuese. Vajza ka punuar tek Autoritetit i Mbikëqyrjes Financiare, Ndërkohë, djali pranë Agjencisë së Blerjeve të Përqendruara.
Kryebashkiaku i Elbasanit, Gledian Llatja
Bashkëshortja e kryebashkiakut të Elbasanit, Solora Jaupaj shërben si drejtore kabineti e Ministrisë së Bujqësisë drejtuar nga Anila Denaj.
Kryebashkiaku i Lezhës, Pjerin Ndreu
Bashkëshortja e Kryebashkiakut të Lezhës është specialiste pranë Auditit në Ministrinë e Brendshme.
Kryebashkiaku i Librazhdit, Kastriot Gurra
Bashkëshortja e kryebashkiakut të Librazhdit Kastriot Gurra, rezulton pranë Qendrës Kombëtare të Biznesit.
