Nepali është përfshirë nga skena të paprecedenta dhune, ku protestuesit kanë kapur dhe poshtëruar ministra të qeverisë në mes të revoltës që ka paralizuar kryeqytetin Katmandu. Në një video që po qarkullon me shpejtësi në rrjetet sociale, shihet ministri i Financave, i zhveshur krejtësisht, teksa detyrohet të ecë në lumë nën dhunën e turmës. Pas tij, një protestues e godet me kamzhik, ndërsa turma e mbledhur pranë shpërthen në brohoritje.
Kjo skenë pason djegien të gjallë të bashkëshortes së ish-kryeministrit të vendit, si dhe djegien e ndërtesave qeveritare dhe rezidencave të politikanëve, përfshirë Parlamentin dhe Gjykatën e Lartë, duke shënuar ditët më të errëta të vendit që prej shpalljes së republikës në vitin 2008. Kryeqyteti është kthyer në arenë lufte, pasi turmat sfiduan shtetrrethimin dhe përleshjet me policinë u përshkallëzuan me dhunë ekstreme.
Autoritetet konfirmojnë se të paktën 22 persona kanë humbur jetën, ndërsa qindra të tjerë janë plagosur. Forcat e rendit përdorën armë zjarri, ujë me presion dhe gaz lotsjellës për të shpërndarë protestuesit, por nuk arritën të ndalonin dhunën. Ushtria është dislokuar në Katmandu për të rikthyer rendin, ndërsa vendi përballet me krizën më të rëndë politike dhe shoqërore të dekadave të fundit.
Revolta nisi pas vendimit të qeverisë për të bllokuar rrjetet sociale, por shumë shpejt mori përmasa më të gjera, duke u kthyer në një shpërthim të pakontrolluar kundër korrupsionit endemik, mungesës së mundësive ekonomike dhe zhgënjimit të brezit të ri. Brezi i ashtuquajtur Gen Z është në ballë të protestave, duke e shndërruar këtë lëvizje në një moment historik që sfidon jo vetëm qeverinë e rrëzuar, por gjithë rendin politik të vendit.
