Shefi i shërbimit zjarrfikës të Maliqit, Sadik Halili, ka folur për detajet e para të tragjedisë që tronditi qytetin ditën e djeshme, ku nëna 40-vjeçare Merjeme Hazisllari dhe djali i saj 14-vjeçar, Luka, humbën jetën pas një zjarri të rënë në banesën e tyre.
Halili tha se ekipi i zjarrfikësve është njoftuar rreth orës 13:30 të datës 19 tetor dhe ka mbërritur në vendngjarje për më pak se një minutë, pasi distanca ishte e afërt. Ai tregoi se kur kanë hyrë në banesë, flakët ishin shuar, ndërsa dy fëmijët ishin gjetur jashtë shtëpisë, dhe nëna e tyre, e asfiksuar, pranë derës së kuzhinës.
“Njoftimin e morëm nga salla operative e policisë. Kur mbërritëm, zjarr nuk kishte më brenda. Djali ishte i pavetëdijshëm, vajza e vetëdijshme, ndërsa nëna u gjet pa shenja jete tek dera e kuzhinës. Njoftuam ambulancën, i dhamë ndihmën e parë dhe i dërguam në spitalin e Korçës”, tha Halili.
Sipas tij, grupi hetimor po punon për të përcaktuar shkakun e saktë të zjarrit, ndërsa aktualisht janë dy pistat kryesore.
“Brenda në kuzhinë ndodhej soba me dru e ndezur, ndërsa në dysheme u gjetën disa fije shkrepëse të ndezura. Nuk mund të themi ende se cila është pista përfundimtare”, shtoi shefi i zjarrfikësve.
Ngjarja e rëndë ndodhi në bllokun nr. 3 të Maliqit, në banesën e familjes Azisllari. Nga flakët humbën jetën nëna dhe djali i saj 14-vjeçar, ndërsa vajza 6-vjeçare mbeti e plagosur rëndë. E mitura u gjet në oborr, pasi dyshohet se është hedhur nga dritarja për të shpëtuar, dhe u transportua fillimisht në spitalin e Korçës, më pas në QSUT, ku ndodhet në gjendje kritike.
Sipas burimeve spitalore, vajza ka pësuar djegie të shumta dhe plagë të rënda në trup. Nëna dhe djali u asfiksuan nga tymi dhe pësuan djegie të rënda, ndërsa 40-vjeçarja u gjet e pajetë pranë derës së kuzhinës, ku dyshohet se kishte tentuar të shpëtonte fëmijët.
Familja Azisllari jetonte në kushte të vështira ekonomike dhe fëmijët vuajnë nga autizmi. Tragjedia ka tronditur thellë komunitetin e Maliqit, ndërsa hetimet për të zbardhur shkaqet e zjarrit vijojnë.
