Pas arrestimit të Ilirjan Selmanit, i dyshuar për vrasjen e 52-vjeçares Kozeta Teco në Pogradec, ka reaguar nëna e tij, Sanie Selmani, e cila mohon kategorikisht përfshirjen e të birit në këtë krim.
Në një deklaratë të dhënë jashtë kamerave, Sanie Selmani ka shprehur bindjen se djali i saj është i pafajshëm dhe se nuk ka asnjë lidhje me ngjarjen e rëndë që tronditi komunitetin lokal. “Djali im nuk mund të vriste askënd, aq më pak atë grua që e njihte mirë. Dje ai ishte kthyer nga Korça dhe, si çdo ditë tjetër, shkoi te dera e saj për t’i marrë mbeturinat, sepse ajo nuk dilte dot nga shtëpia. Nuk ka bërë ai asgjë. Nuk ka prova kundër tij,” është shprehur ajo.
Nëna e të dyshuarit tha se, pavarësisht kundërshtimeve fillestare për lidhjen e Ilirjanit me viktimën, familja e kishte pranuar marrëdhënien. “Ne nuk ishim dakord në fillim për lidhjen, por ai e kishte pranuar siç ishte dhe nuk i kemi kërkuar të ndahet. Ai nuk krijonte probleme, e njihnin të gjithë në lagje,” tha Selmani.
Ajo akuzon gjithashtu policinë për mënyrën e ndalimit të të birit, duke theksuar gjendjen e tij të rënduar shëndetësore. “Kam lexuar shumë gënjeshtra në media. Dje erdhën shumë policë, desh e mbytën kur e morën. Djali im është i sëmurë nga zemra. Duam që policia të nxjerrë të vërtetën, ai nuk është vrasësi,” theksoi ajo.
Ngjarja vijon të jetë nën hetim nga autoritetet dhe ende nuk ka një deklaratë përfundimtare nga Policia e Shtetit mbi autorësinë e krimit. Familjarët e Ilirjan Selmanit kërkojnë drejtësi dhe hetim të plotë për zbardhjen e së vërtetës.
