Një ekspozitë që tejkalon format tradicionale dhe shndërrohet në një rrëfim emocional për qytetin, historinë dhe kujtesën kolektive të tij.
Kjo është “Nën Qyteti”, ekspozita më e re e piktorit pogradecar Anastas Kostandini, i njohur për publikun si Taso, e hapur mbrëmjen e së shtunës në Galerinë e Arteve në Pogradec.
Përmes 31 vizatimeve të realizuara me mjeshtëri dhe ndjeshmëri, Taso sjell fragmente nga e shkuara e qytetit të tij, duke rikthyer në vëmendje jetën e dikurshme, traditat dhe thelbin identitar të Pogradecit.
Për autorin, ekspozita është më shumë se një paraqitje artistike. Ajo është një akt dashurie për qytetin e tij: “E gjithë ekspozita është një himn për qytetin, për jetën e dikurshme, për jetën tonë, për traditat tona. Ekspozita është mbështetur mbi aftësinë time për të vizatuar e për të krijuar skena që lidhen me historinë e qytetit dhe periudha shumë të largëta. Kjo edhe për faktin se qyteti jonë ka shumë nevojë të jetë shumë i vetëdijshëm për identitetin e vet dhe mendoj se ky është një kontribut. Nëpërmjet 31 vizatimeve, unë zbuloj, udhëtoj nëpër memorien time, që shpresoj që qytetarët të ndihen të emocionuar”, – u shpreh Taso.
Ekspozita përfshin edhe elementë modernë dhe ndërveprues, në disa pika të qytetit janë vendosur kode QR që mund të skanohen nga qytetarët për të lexuar historinë pas çdo vepre.
Kështu, ekspozita nuk qëndron vetëm brenda galerisë, por shtrihet në hapësirën urbane, duke e bërë artin pjesë të përditshmërisë.
“Ekspozita besoj që ka një paraqitje të veçantë, në gjithë qytetin janë shpërndarë bar code që korrespondojnë me vizatimet. Ti mund t’i skanosh ato dhe më pas të lexosh historikun e tyre. Është një punë komplekse dhe ekspozitë e veçantë për galerinë tonë”, shtoi piktori.
I pranishëm në hapje të ekspozitës ishte edhe regjisori dhe aktori Mevlan Shanaj, i cili vlerësoi jo vetëm dimensionin estetik të punës, por edhe mesazhin e fortë qytetar që ajo përcjell:
“Është rasti të rithem që ky Taso të befason me kërkimet e tij për të bërë qytetin e Pogradecit. Një pogradecar i jashtëzakonshëm, si edhe piktor i zoti. Çdo vit ai sjell ekspozita, por kjo e sotmja lidhet me diçka shumë të veçantë. Të gjitha këto punime janë punuar me një dashuri qytetarie. I ka dhënë Pogradecit një shikim shumë të veçantë, me një dimension qytetar. Tasoja e shikon si qytet europian, çdo gjë ka një lëvizje shumë të emancipuar. Pikërisht kjo është e veçanta e ekspozitës sipas meje. Unë ja njoh Tasos të gjitha punët, e përgëzoj”.
Ekspozita “Nën Qyteti” do të qëndrojë e hapur për vizitorët në Galerinë e Arteve në Pogradec.
Përmes veprave, teknologjisë dhe shpërndarjes në hapësirën publike, ajo transformon qytetin në një galeri të hapur ku ndërthuren kujtesa, arti dhe ndjeshmëria qytetare.
