Deputeti demokrat Asllan Dogjani do të përballet me drejtësinë, pasi GJKKO ka vendosur kalimin për gjykim të dosjes ndaj tij. Ai akuzohet nga SPAK për fshehje dhe deklarim të rremë të pasurisë, konkretisht për një apartament rreth 100 m² në Tiranë.
Sipas deklarimeve të tij, Dogjani ka pretenduar se e ka përfituar apartamentin si kompensim për shërbime konsulence juridike ndaj një kompanie ndërtimi.
Ai ka dorëzuar një kontratë ku thuhej se apartamenti ishte dhënë në këmbim të shërbimeve të ofruara dhe atyre që do të ofroheshin në të ardhmen.
Por hetimet e SPAK kanë zbuluar se, në kundërshtim me këtë pretendim, Dogjani ka blerë apartamentin me një vlerë prej 121.980 euro, të cilat dyshohet se i ka paguar në dorë, duke fshehur mënyrën reale të transaksionit.
Në dosje theksohet gjithashtu se kontratat e paraqitura nga deputeti përmbajnë të njëjtin numër protokolli, por me përmbajtje të ndryshme, një detaj që SPAK e konsideron si provë të një përpjekjeje për të justifikuar me dokumente fiktive burimin e pasurisë.
Tashmë, Dogjani do të përballet në gjykatë me akuzën e “refuzimit për deklarim, mosdeklarim, fshehje ose deklarim të rremë të pasurisë”.
