Ministri Federal i Punëve të Jashtme, Heiko Maas ka folur ditën e sotme lidhur me integrimin në Bashkimin Evropian të vendeve të Ballkanit Perëndimor.
Heiko Mass ka çelur takimin virtual mes Ministrave të Jashtëm të Procesit të Berlinit, ku dhe ka theksuar se Maqedonia e Veriut dhe Shqipëria kanë bërë progres në reformën në drejtësi dhe luftën kundër korrupsionit dhe krimit të organizuar.
“Maqedonia e Veriut dhe Shqipëria kanë bërë progres të qëndrueshëm në reformën në drejtësi dhe luftën kundër korrupsionit dhe krimit të organizuar. Me Marrëveshjen e Prespës Shkupi dhe Athina treguan lidership politik me rëndësi historike. Kjo është arsyeja pse bisedimet e anëtarësimit me Maqedoninë e Veriut dhe Shqipërinë duhet të nisin tani. Falënderoj Presidencën Portugeze për marrjen përsipër të kësaj detyre për më tej – do të ketë mbështetjen tonë të plotë!
Më lejoni të jem i qartë: të gjithë ne e dimë që politika e brendshme mund të kufizojë hapësirën e lëvizjes për politikën e jashtme. Kuptojmë gjithashtu që çështje të caktuara të historisë dhe identitetit janë delikate. Por çështje të tilla dypalëshe nuk do të duhej të pengonin gjithë procesin e anëtarësimit”, tha Maas.
Në Twitter Maas ka shkruar se e ardhmja e vendeve të Ballkanit Perëndimor është në Bashkimin Evropian.
“E ardhmja e të gjitha vendeve në Ballkanin Perëndimor qëndron në #BE. Ne kemi nevojë për të rifilluar procesin e zgjerimit dhe për të ecur përpara me pajtimin rajonal. Ky ishte mesazhi im në takimin e sotëm të ministrave të jashtëm të Procesit. #Berlin”, shkruan Maas.
