Ditën e sotme, Nehat Kulla i njohur si “Gjenerali” ose i forti i 1997-ës ndërroi jetë në banesën e tij në Tiranë.
Kulla është ndarë nga jeta në moshën 67-vjeçare.
Pak kohë më parë, Kulla humbi edhe vëllain e tij Ramazan Kulla i cili ishte prekur nga Covid-19.
Lajmin për humbjen e 60-vjeçarit Ramazan Kulla për shkak të koronavirusit, e bëri me dije vetë Ministria e Shëndetësisë.
Kjo e fundit njoftoi se në 26 prill, 60-vjeçari Ramazan Kulla humbi jetën në spitalin “Shefqet Ndroqi” pasi ishte infektuar me Covid-19.
“Pacienti vuante nga disa sëmundje bashkëshoqëruese (Diabet Melitus, Kardiopatia Hipertensive, Nefropatia Diabetike, Obezitet).
Pavarësisht trajtimit të bërë nga stafi mjekësor, asistencës të ventilimit mekanik të respiracionit dhe mjekimit intensiv, 60-vjeçari nuk ka mundur të mbijetojë”, ishte ky njoftimi i bërë nga Ministria e Shëndetësisë për humbjen e Ramazan Kullës.
E ndërkohë që muaji prill ka qenë muaji i izolimit total me urdhër të qeverisë, për mospërhapjen e virusit Covid-19, burime ekskluzive për gazetën “Reforma.com”, bëjnë me dije se në varrimin e Ramazan Kullës ka pasur të pranishëm mbi 1 mijë persona.
Kujtojmë këtu se pjesëmarrja në vendet apo evenimentet me shumë persona të pranishëm, ka qenë i ndaluar, pasi duhet respektuar ende distancimi social.
Edhe lëvizja e mjeteve apo lëvizja e personave nga një qytet në tjetrin ka qenë rreptësisht e ndaluar dhe masat ndëshkuese të vendosura nga qeveria dhe të bëra publike nga kryeministri Rama kanë qenë të ashpra, por mesa duket nuk kanë funksionuar.
Po ashtu këto burime ekskluzive për gazetën “Reforma.com”, shprehen se edhe Nehati ka qenë i infektuar me Covid-19 dhe se ka refuzuar të shkonte në spitalin “Shefqet Ndroqi” për t’u shtruar e kuruar, ndaj edhe ka humbur jetën.
Ditën e sotme Ministria e Shëndetësisë raportoi për 82 raste të reja në vendin tonë, në 24 orët e fundit.
