Gjatë vizitës së saj disa ditore në Shetet e Bashkuara të Amerikës, Zëvendëskryeministrja dhe Ministrja e Infrastrukturës dhe Energjisë, Belinda Balluku, u takua me Gabriel Escobar, të dërguarin e SHBA për Ballkanin Perëndimor.
Në bisedën e tyre, Balluku e siguroi Escobarin se Qeveria shqiptare është e përkushtuar në plotësimin e angazhimeve të marra dhe në luajtjen e një roli të rëndësishëm në rajon, duke dhënë shembullin e mirë për të tjerët.
Postimi i Ballukut:
Uashington- Në Departamentin e Shtetit takova Gabriel Escobar, i dërguari i SHBA-së për Ballkanin Perëndimor, ku diskutuam për një sërë çështjesh kritike për rajonin, për aktualitetin e ditëve të fundit dhe mbi të gjitha për rolin e rëndësishëm që Shqipëria dhe Kryeministri Rama po luajnë në këto momente vendimtare.
Escobar mbetet një nga njohësit më të mirë të rajonit pranë Departamentit të Shtetit. Ai dhe skuadra e tij janë të gatshëm të ndihmojnë në zgjidhjen e situatave dhe mbarëvatjen e reformave dhe proceseve jetësore për vendet e Ballkanit Perëndimor.
E sigurova që Qeveria Shqiptare është e fokusuar plotësisht për përmbushjen e angazhimeve të marra dhe mbi të gjitha jemi koshient për rolin e rëndësishëm që duhet të luajmë në rajon dhe shembullin e mirë që duhet të japim.
