Greva e 14 punonjësve të nënstacionit të pompimit të Poçemit ka hyrë në ditën e tetë.
Ndërkohë naftëtarët e Ballshit janë futur në ditën e tretë të grevës së urisë.
Punonjësit e nënstacionit të pompimit nuk paguhen prej 27 muajsh, ndërsa ato të uzinës së Ballshit nuk kanë marrë 5 rrogat e fundit.
Kur kanë kaluar disa ditë nga greva, punëtorët kanë filluar të shfaqin probleme shëndetësore.
Ata thanë për “News24”, se nuk u duhet më jeta, pasi janë zhytur në borxhe.
Grevistët i bënë thirrje kryeministrit Edi Rama dhe ambasadave të huaja, që të ndërhyjnë për të zgjidhur problemin e tyre.
Për ta mundësia e vetme që të ndërpresin grevën është marrja e 27 pagave të prapambetura.
Dy prej grevistëve janë zëvendësuar nga kolegët e tyre, për shkak se janë ndjerë keq.
“Jemi mbytur në borxhe, e kemi shkruar emrin në të tëra dyqanet, nuk shkojmë dot në shtëpi. I lutemi kryeministrit të shohë ku ka hasur vështirësi që nuk po na paguajnë, nuk po na japin rrogat. Ne të vdekur jemi, për çfarë i duam mjekët të jetojmë më?”, tha një prej grevistëve.
Ditën e sotme, grevistët u vizituan nga kreu i Partisë Demokratike, Lulzim Basha.
