Një dosje hetimore e Prokurorisë së Posaçme (SPAK) hedh dritë mbi mënyrën se si kryetari i Bashkisë së Tiranës, Erion Veliaj, dyshohet se ka përdorur autoritetin e tij për përfitime personale dhe familjare. Sipas dokumenteve hetimore, në vitin 2021 është kryer një ndryshim në Planin e Detajuar Vendor për rrugën “Hajdar Kërçiku”, i cili përfshiu edhe një pronë të bashkëshortes së tij, Ajola Xoxa.
Ky ndryshim rezultoi në rritjen e vlerës së pronës së Xoxës me mbi 37 milionë lekë. Rruga e re, e cila në realitet nuk ekzistonte, u përfshi në hartë duke përfshirë prona private, përfshirë edhe atë të qytetares Lindita Çokut, e cila dorëzoi kallëzim pranë SPAK për shpërdorim detyre.
Në vazhdim, Veliaj miratoi lejen për ndërtimin e një pallati 11-katësh mbi pronën e familjes Xoxa. Pavarësisht konfliktit të interesit, që sipas dosjes ishte i qartë, u ndërmorën hapa për të fshehur marrëdhëniet përmes kontratave fiktive të shitjes, ku djali i xhaxhait të Ajolës u shfaq si pronar i truallit.
Sipas SPAK, Veliaj ka ndryshuar intensitetin e ndërtimit në plan, duke rritur sipërfaqen e lejuar ndërtimore dhe kështu ka përfituar vlera të konsiderueshme ekonomike për familjen. Prokuroria thekson se veprimet e kryetarit të bashkisë janë kryer në kundërshtim me ligjin, pasi ai nuk ka kompetencë për të krijuar rrugë të reja dhe ka miratuar dokumente mbi fakte të pavërteta.
Në përfundim, SPAK argumenton se nëpërmjet këtyre ndryshimeve në planifikimin urban dhe në lejet e ndërtimit, Erion Veliaj dhe familja e tij kanë përfituar në mënyrë të paligjshme.
