Dy shtetas shqiptarë të shpallur në kërkim ndërkombëtar për vepra të ndryshme penale janë arrestuar dhe ekstraduar në Shqipëri nga Gjermania dhe Italia, në kuadër të operacionit të koduar “Wanted”.
Nga autoritetet gjermane u ekstradua 21-vjeçari Danjel Lalaj. Ai ishte shpallur në kërkim pas një vendimi të Gjykatës së Posaçme të Shkallës së Parë kundër Korrupsionit dhe Krimit të Organizuar në vitin 2021, e cila i kishte caktuar masën “arrest me burg” për akuzat “Kultivim i bimëve narkotike”, “Pjesëmarrje në grup të strukturuar kriminal” dhe “Kryerje e veprave penale nga organizatë kriminale”.
Ndërkohë, në Milano të Italisë u arrestua dhe më pas u ekstradua drejt Shqipërisë 35-vjeçari Kledjon Berberi, banues në Korçë.
Ai ishte shpallur në kërkim pas një vendimi të Gjykatës së Shkallës së Parë të Juridiksionit të Përgjithshëm Korçë, në vitin 2024, ku ndaj tij ishte vendosur masa e sigurisë “arrest me burg” për “Heqje të paligjshme të lirisë” dhe “Kanosje për dëshmi apo deklarim të rremë”.
Berberi akuzohet se në qershor të vitit 2024, në bashkëpunim me një tjetër person, ka rrëmbyer dhe dhunuar rëndë një shtetas, duke e mbajtur me forcë në një automjet.
