Tre persona të lidhur me ngjarje të rënda kriminale dhe bashkëpunëtorë të të shumëkërkuarit Talo Çela janë arrestuar në Dubai, si pjesë e operacionit ndërkombëtar “The Wanted”, me qëllim ekstradimin e tyre drejt Shqipërisë.
Në pranga kanë rënë Ervis Daka, Maksim Koçi dhe Ado Xhika, të gjithë me masa sigurie “arrest në burg” të caktuara nga Gjykata e Posaçme, për vepra të rënda penale të kryera në kuadër të një grupi të strukturuar kriminal.
Ervis Daka, 38 vjeç, akuzohet për tentativë vrasjeje, sigurim kushtesh për kryerjen e vrasjes, armëmbajtje pa leje dhe përkrahje të autorit të krimit. Sipas dosjes hetimore, ai ka ndihmuar autorët e atentatit ndaj shtetasit K.P., ka siguruar mjetet për një tjetër vrasje të planifikuar ndaj shtetasit A.S., si dhe ka strehuar Talo Çelën duke i krijuar kushte për jetesë.
Maksim Koçi, 39 vjeç, përballet me akuza për vrasje me paramendim për interes apo hakmarrje, armëmbajtje pa leje dhe ndihmë për autorin e krimit. Ai dyshohet se ka qenë i përfshirë në ekzekutimin e shtetasve K.K. dhe I.A., ka përgatitur kushtet për vrasjen e dy të tjerëve, A.S. dhe A.C., si dhe ka ndihmuar Talo Çelën për t’u fshehur nga autoritetet.
Ado Xhika, 40 vjeç, akuzohet për përkrahje të autorit të krimit. Provat e mbledhura tregojnë se për gati dy vite, ai ka ndihmuar në strehimin e Talo Çelës dhe madje ka ndërmjetësuar për një intervistë me një gazetar, me qëllim që Çela të shfaqej publikisht.
Të tre janë ndaluar nga autoritetet në Dubai dhe pritet të ekstradohen drejt Shqipërisë për t’u përballur me drejtësinë.
