Policia e Tiranës ka vënë në pranga së fundmi shtetasin Erind Bicerri, i cili pas krimeve në Itali, ishte shpallur në kërkim ndërkombëtar. Arrestimi i tij ka ndodhur në rrugën “Arkitekt Kasemi” në kryeqytet. Mësohet se Erind Bicerri, ishte dënuar nga Gjykata e Apelit në Milano me 7 vite burg për akuzën “Marrëdhënie seksuale me dhunë”, “Rrëmbim personi” si dhe vepra të tjera. Tashmë, Interpol Tirana po bashkëpunon me Interpol Roma për ekstradimin e 30-vjeçarit i cili do të vuajë dënimin në shtetit italian.
Njoftimi i Policisë:
Operacioni nga Drejtoria Vendore e Policisë Tiranë, Departamenti i Policisë Kriminale dhe Interpol Tirana. Në vijim të punës për kapjen e personave në kërkim kombëtar e ndërkombëtar, Sektori i Forcës së Posaçme Operacioneve Speciale dhe Kërkimit, në Drejtorinë Vendore të Policisë Tiranë, në bashkëpunim me Departamentin e Policisë Kriminale dhe Interpol Tirana, zhvilloi një operacion për kapjen e një të kërkuari nga drejtësia italiane, si rezultat i të cilit, në rrugën ”Arkitekt Sinani”, Tiranë, u bë e mundur kapja e 30-vjeçarit E.B., banues në Tiranë.
Arrestimi i përkohshëm i tij u krye pasi shtetasi E. B. ishte person i shpallur në kërkim ndërkombëtar nga Interpol Roma. Gjykata e Apelit Milano/ Itali e ka dënuar këtë shtetas me 7 vjet burg për kryerjen e veprave penale “Marrëdhënie seksuale me dhunë”, “Rrëmbim” dhe vepra të tjera. Interpol Tirana në bashkëpunim me Interpol Romën vijojnë punën për ekstradimin e tij drejt Italisë.
