Para ndeshjes mes Kroacisë dhe Shqipërisë, tifozët kuqezi në Hamburg krijuan një atmosferë festive që tërhoqi vëmendjen edhe të policisë gjermane. Në një moment të veçantë, disa policë gjermanë u bashkuan me tifozët shqiptarë, duke hequr për disa minuta uniformat e tyre për t’u përfshirë në vallëzimet tradicionale. Një video e bërë virale tregon dy policë që kërcejnë së bashku me tifozët kuqezi nën ritmet e muzikës popullore, duke treguar një anë më të ngrohtë dhe të afërt të autoriteteve gjermane.
Në kontrast të thellë, në Shqipëri, një polic është pezulluar nga puna për sjellje të cilësuar si “joprofesionale” pasi bëri selfie me dy turiste gjermane gjatë orarit të punës. Incidenti ndodhi më 10 qershor në kryqëzimin e Tales, kur policia ndaloi automjetin e drejtuar nga shtetasja gjermane J. W., e cila po qarkullonte me një dritë të djegur. Për shkak se turistja nuk dinte shqip, polici komunikoi me të përmes Google Translate dhe e ndëshkoi me një gjobë administrative prej 1000 lekësh, e cila u përgjysmua në 500 lekë pasi ajo e pagoi menjëherë.
Pas ndalimit, turistja e huaj postoi një video në TikTok ku tregonte komunikimin me policin shqiptar dhe momentin kur ata bënë një foto së bashku. Videoja u bë virale dhe si pasojë, polici u pezullua nga puna dhe u transferua në një strukturë tjetër të policisë.
Në një njoftim zyrtar, Drejtoria e Standardeve Profesionale në Drejtorinë e Përgjithshme të Policisë së Shtetit deklaroi: “Në lidhje me sjelljen në mënyrë joprofesionale, gjatë kryerjes së detyrës, të punonjësit të Policisë Rrugore në Drejtorinë Vendore të Policisë Lezhë, inspektor R. Xh., gjatë komunikimit me një shtetase gjermane, Drejtoria e Standardeve Profesionale ka pezulluar menjëherë punonjësin e Policisë dhe ndaj tij ka nisur ecurinë disiplinore.”
Teksa në Gjermani, një vend i ‘prapambetur’ policia tregon një qasje më të afërt dhe miqësore me tifozët dhe turistët, në Shqipëri, vendi më i ‘zhvilluar’ një polic ndëshkohet për përpjekjen e tij për të qenë i komunikueshëm dhe ndihmues.
Pa përmendur që persona të akuzuar për krime të rënda, zyrtarë të akuzuar për korrupsion dhe pastrim parash, ecin me duar në xhepa nëpër Tiranë, ndërkohë që duhet bërë shembull një polic. Edhe vetting, i cili është propozuar në polici, nëse ka vullnet dhe kërkohet efektivitet, duhet të fillojë nga koka, ministri i Brendshëm, Taulant Balla, i cili është përfolur për inkriminim me bandat dhe jo të përdoret për propagandë duke bërë ‘mish për top’ policë të thjeshtë.
