Dritan Dajti, i arrestuar për vrasjen e katër oficerëve të Policisë së Shtetit dhe një biznesmeni, dyshohet se është shoqëruar të premten nga Policia e Burgjeve në mes të zonës së populluar të ish-Bllokut.
Motivet e kësaj vizite janë ende të paqarta.
Gazeta ‘Tema’ ka publikuar një foto, në të cilën duket se është Dajti i shoqëruar nga forca të shumta policie,.
Sipas saj, pamjet janë marrë paraditen e të premtes nga një prej kafeneve të njohura të zonës.
Fillimish, prej pranisë së shtuar të forcave të policisë gazetari, që kishte shkrepur fotot, kishte menduar se dikush do të arrestohej.
Pak minuta, më vonë ai kishte parë të burgosurin të dilte nga një furgon dhe të shkonte drejt një hyrje ku gjendet klinika e një dentisti të njohur.
Më tej, gazetari tregoi se Dajti kishte qëndruar rreth 1 orë në godinë.
Por, shtoi se nuk e kishte verifikuar nëse Dajti kishte shkuar te dentisti, por se hyrja në të cilën u fut përkonte me atë të klinikës dentare.
BIRN ka komunikuar me Drejtorin e Përgjithshëm të Burgjeve, Agim Ismailaj, i cili e cilësoi si “ekzagjerim të medias”.
Por, në të njëjtën kohë Ismailaj nuk e mohoi që personi të kishte qenë Dajti.
Nuk ka ende asnjë reagim zyrtar rreth kësaj çështjeje.
Dritan Dajti u dënua me burgim të përjetshëm nga Gjykata e Krimeve të Rënda për vrasjen e katër punonjësve të policisë dhe ndodhej në qeli prej masakrës së vitit 2009.
Megjithatë, më 8 shkurt 2019 një trupë gjyqësore e komanduar pranë Apelit vendosi të shuante burgimin e përjetshëm për Dajtin, duke e dënuar atë me 25 vjet burg.
Edhe pse çështja shqyrtohej në gjykatë prej 10 vitesh, tre gjyqtarët Skënder Damini, Aleks Nikolli dhe Petrit Aliaj vendosën të pranojnë kërkesën e Dajtit për gjykim të shkurtuar; çka solli uljen e 1/3 së dënimit.
