Ditën e sotme gjykata e Fierit ka dhënë masën e sigurisë “arrest me burg për 30 ditë” për edukatoren Redina Binjaku, e arrestuar pas vdekjes së fëmijës 3-vjeçar në kopshtin privat ku ajo punonte.
Gjykata ka vendosur shoqërimin e saj në dhomat e paraburgimit të IEVP në Fier. Në vendim thuhet se Binjaku ka të drejtën e ankimimit të vendimit në Apelin e Vlorës brenda 5 ditëve që nesër.
Edukatorja nuk ka qenë e pranishme në seancën e sotme, por e përfaqësuar nga avokati mbrojtës. Në një letër drejtuar Gjykatës të cilën e ka zbardhur “Ballkan Ëeb”, ajo ka dhënë dhe arsyet e vendimit të saj, duke thënë se ndihet shumë e ngarkuar psikologjikisht për shkak të ngjarjes dhe i shpreh ngushëllimet familjes.
“Unë shtetasja Redina Binjaku mora njoftim për seancën gjyqësore të datës 11.01.2022 ora 10:00. Në radhë të parë i shpreh ngushëllimet më të sinqerta familjes së të miturit Noah Kodheli.
Jam shumë e ngarkuar psikologjikisht prej situatës në të cilën ndodhem. Për këtë shkak nuk mund të marr pjesë në zhvillimin e seancës për vlerësimin e arrestit dhe caktimin e masës së sigurimit personal.
Kërkoj të përfaqësohem nga avokati im Ylli Asimetaj, anëtar i Dhomës së Avokatisë Fier”, shprehet 27-vjeçarja në letrën e saj.
Ajo ka deklaruar se ka qenë duke u kujdesur për një fëmijë tjetër në kohën kur ndodhi ngjarja.
