Që nga dita e protestës para selisë së Qeverisë më 14 shtator, të afërmit e fëmijëve që ndodhen në Siri nuk kanë marrë asnjë përgjigje nga qeveria.
Në një kontakt që pati Gazeta Reforma me Fatjon Ndregjonin, një nga të afërmit e fëmijëve Endirit dhe Eva Dumanit, mëson se nuk është bërë asnjë hap i ri për të bërë të mundur kthimin e fëmijëve nga Siria.
“Përshëndetje, faleminderit për vëmendjen. Për gjendjen e fëmijëve në Siri nuk ka asnjë zhvillim të ri”, deklaron Ndregjoni.
E vetmja lëvizje që bëri qeveria, pas protestës së 14 shtatorit ishte dërgimi i ministrit të Brendshëm, Sandër Lleshaj në Libi, për të kërkuar ndihmën e autoriteteve të atjeshme për kthimin e fëmijëve.
Deri tani është kthyer vetëm një fëmijë në Shqipëri nga kampi. Al Hol, është Alvin Berisha,i cili u ndihmua vitin e kaluar nga Gjysmëhëna arabe e Sirisë dhe autoritetet italiane.
Babai i tij deklaroi se autoritetet shqiptare kishin zvarritur procesin dhe nuk e kishin ndihmuar me gjetjen e të birit. Në kampin Al Hol gjenden mbi 50 fëmijë të identifikuar nga të afërmit.
/GazetaReforma.com/
