Administratori i Njësisë Administrative të Ostrenit, Altin Tola, ka zbardhur detaje të reja nga ngjarja e rëndë ku humbën jetën nëna me dy fëmijët, të cilët ai i kishte të afërm.
Në një intervistë për “Balkanweb”, Tola ka treguar momentet kur janë gjetur trupat e pajetë.
Ai shton se dy infermierët që shkuan në vendin e ngjarjes, i kishin dhënë ndihmë mjekësore vajzës së vogël, Meritës, e cila ka shpëtuar.
“Kam kontaktuar dhe kam qenë ndër personat e parë që kanë shkuar në vendin e ngjarjes. Në momentin që shkova atje, 3 personat e tjerë kishin ndërruar jetë. U gjetën në pozicione të ndryshme në kuzhinë. Ndërsa vajzën e kishin gjetur dy kunatat e Rajmondës. Më pas njoftuan organet e shëndetësisë. Dy infermiere dhe shoferi i ambulancës kanë shkuar në vendin e ngjarjes, por ata kishin ndërruar jetë dhe i kishin dhënë ndihmë mjekësore vajzës së vogël, Meritës.”, u shpreh ai.
Përsa i përket shkakut të vdekjes, ende është enigmë dhe pritet përgjigja e ekspertizës mjeko-ligjore, ndërsa ka dalë në skenë pista e asfiksisë nga
Tola shton, se në mbledhjen e radhës të Këshillit Bashkiak, do të propozohet një ndihmë financiare për familjarët.
“Unë kur shkova, nuk kishte asnjë aromë të keqe. Soba kishte qenë ndezur. Zona jonë është e ftohtë dhe detyrimisht ngrohemi me dru. A ka ardhur nga zjarri, nga gazi, nga ushqimet, ne ende nuk dimë gjë. Sapo të dali ekspertiza e shëndetësisë, atëherë do dalin e vërteta. Në mbledhjen e radhës të Këshillit Bashkiak do të propozohet që të kërkohet një ndihmë financiare për të zbutur sado pak dhimbjen e tyre. Unë i kam të afërmit e mi.”, është shprehur ai.
Përsa i përket 16-vjeçares së mbijetuar, ai thotë se është e trishtuar dhe nuk është në gjendje të përballojë këtë situatë.
INTERVISTA
Ju jeni administratori i Ostrenit. Mund të na tregoni historinë e ngjarjes së rëndë në familjen Tolaj?
Është një ngjarje shumë e rëndë, jo vetëm për familjen, por për të gjithë njësinë administrative të Ostrenit dhe të bashkisë së Bulqizës, pasi humbën jetën 3 persona. Nëse nuk do të kishte reaguar shëndetësia, mund të kishte humbur jetën dhe vajza tjetër, e cila ndodhet në spital. Ajo u transportua nga ambulancën e qendrës shëndetësore e Osternit, ku kam qenë i pranishëm dhe e kam shoqëruar deri në spitalin e Bulqizës. Vajza, në kontaktin që kam pasur me spitalin e Tiranës, rezulton se është më mirë dhe është jashtë rrezikut për jetën. Ajo nuk e di që akoma që kanë humbur jetën nëna dhe vëllai dhe motra e saj.
Sipas jush nga se ka ardhur vdekja e tyre?
Akoma nuk dihen shkaqet, pasi është bërë autopsia nga organet e shëndetësisë. Dhe vajza është marrë në pyetje. Por vajza është e trishtuar dhe nuk është në gjendje të përballojë këtë situatë. Ndoshta më vonë ajo do të reagojë dhe do të tregojë ngjarjen me gojën e saj. Për momentin ajo nuk ka folur.
Keni kontaktuar me banorët e zonës, çfarë thonë ata?
Kam kontaktuar dhe kam qenë ndër personat e parë që kanë shkuar në vendin e ngjarjes. Në momentin që shkova atje, 3 personat e tjerë kishin ndërruar jetë. Ndërsa vajzën e kishin gjetur dy kunatat e Rajmondës. Më pas njoftuan organet e shëndetësisë. Dy infermiere dhe shoferi i ambulancës kanë shkuar në vendin e ngjarjes, por ata kishin ndërruar jetë dhe i kishin dhënë ndihmë mjekësore vajzës së vogël, Meritës.
Është konstatuar aromë e keqe në banesën e familjes Tolaj?
Jo. Dhe unë kur shkova, nuk kishte asnjë aromë të keqe. Soba kishte qenë ndezur. Zona jonë është e ftohtë dhe detyrimisht ngrohemi me dru.
Nuk ka ardhur nga zjarri?
A ka ardhur nga zjarri, nga gazi, nga ushqimet, ne ende nuk dimë gjë. Sapo të dali ekspertiza e shëndetësisë, atëherë do dalin e vërteta.
Nga gojëdhënat e banorëve të zonës ka versione të ndryshme….
Jo nuk ka asnjë version. Mund të jetë ndoshta ndonjë helmim nga ushqimi ose pa dashje nga fëmijët dhe nuk i kanë treguar nënës që mos t’i bërtasin. Ndoshta i kanë ngatërruar (pesticidet). Akoma s’dihet asgjë.
Në pyetje është marrë dhe kunata, pasi ajo shkoi e para në vendin e ngjarjes…
Po janë marrë në pyetje të gjithë. Janë marrë mostrat e ushqimeve, të ujit të pijshëm.
Çfarë thotë kunata?
Ajo ka shkuar rreth orës 10 të paradites. Pasi ka parë se aty s’ka pasur lëvizje para, pasi vajza e saj ishte në klasë me Fajtonin, djalin që humbi jetën. Madje unë më parë e kam pasur në kujdestari, pasi kam qenë mësues para se të merrja detyrën e administratorit. Ndjej një dhimbje tepër të madhe, pasi unë i kam dhe njerëzit e mi familjen Tolaj.
Si ka mundësi të ketë ndodhur kjo ngjarje e rëndë?
Unë mendoj se ka ardhur nga ushqimi.
Është konstatuar që është gjetur një shishe…
Po është gjetur një shishe, por jo në dhomën ku ndërruan jetë personat. Është gjetur në një dhomë tjetër. Ne jetojmë në fshat, dhe kemi në shtëpi pesticide. Dikush i vë në vend, dikush jo.
A është e vërtetë që atë natë kanë ngrënë darkë tek kunata? Deri në 22:00 kanë qenë atje…
Po kanë qëndruar atje, por jo për darkë. Nuk kanë qenë të gjithë, vetëm djali dhe nëna, Rajmonda. Vajzat kanë qenë në shtëpi. Kanë qenë duke pjekur bukën tek soba e drurit. Dhe një nga bukët ishte sipër sobës në momentin që u gjetën.
Të gjithë në një dhomë u gjetën?
Po të gjithë. U gjetën në pozicione të ndryshme në kuzhinë.
Ju si administratë çfarë masash keni marrë për ndihmë?
Sapo mora vesh lajmin, njoftova kryetarin e bashkisë, nënprefektin, dhe më pas kontaktova me prefektin. Kryetari i Bashkisë sapo e njoftova, u nis në vendin e ngjarjes. Atë ditë ka qëndruar rreth 5 orë në vendin e ngjarjes. Po ashtu ka ardhur dhe ditën tjetër në varrim. Të gjitha shpenzimet e varrimit i ka mbuluar bashkia e Bulqizës. Në mbledhjen e radhës të Këshillit Bashkiak do të propozohet që të kërkohet një ndihmë financiare për të zbutur sado pak dhimbjen e tyre.
