Detaje të reja janë zbuluar në lidhje me atentatin e ndodhur ditën e djeshme në Durrës.
Ndaj makinës ku ndodhej prokurori Arjan Ndoja, ‘i forti’ i Sukthit, Landi Muharremi dhe Andi Maloku, u qëllua me breshëri plumbash.
Ky i fundit ndodhet në gjendje të rëndë në spital.
Sipas ‘Top Channel’, pista kryesore ku janë përqëndruar hetimet është konflikti për pronat në Gjirin e Lalëzit.
Për këtë arsye mendohet se shënjestra ka qenë Landi Muharremi dhe jo prokurori Ndoja.
Landi Muharremi, ose i njohur ndryshe si Aleksandër Laho, njihet si një person tepër problematik.
Ai u ndalua dy vite më parë, si i dyshuar në rrahjen barbare të biznesmenit libanez, Faad Mitri në kryeqëzimin e Rinasit.
Pas kësaj ngjarje, biznesmeni libanez u tërhoq nga projekti i tij për Gjirin e Lalëzit.
Mbi të rëndojnë edhe vepra të tjera penale, ndër të cilat edhe dhuna ndaj një avokati në Durrës.
Lufta për pronat në Gjirin e Lalëzit ka marrë përmasa të mëdha në Durrës, ku brenda Kadastrës ka pasur arrestime të shumta, deri në nivele drejtuese.
Përsa i përket atentatit, makina me të cilën po udhëtonin Ndoja e Muharremi po zbriste nga mbikalimi i Shkozetit, për t’u future në autostradën Durrës-Tiranë.
Duke përfituar nga shpejtësia e ulët, autorët kanë qëlluar me breshëri plumbash.
Ndoja ka qenë i ulur në sediljen e parë të pasagjerit dhe plumbat e kanë kapur në shpatullën e majtë.
Pak minuta pas atentatit, policia gjeti një makinë të braktisur në fshatin Shkafane të Ishmit, brenda së cilës ndodheshin dy maska, dy kallashnikovë dhe një shishe me benzinë.
Objeket janë dërguar për ekspertizë në laboratorin shkencor, pasi dyshohet se i përkasin autorëve të atentatit.
Deri më tani janë shoqëruar dhjetëra persona në polici, por nuk ka ende një emër të dyshuar.
