Ka nisur zyrtarisht fushata elektorale e Partisë Demokratike në sheshin “Nënë Tereza”.
Qindra mbështetës demokratë ndodhen tani në këtë shesh me flamuj e pankarta në duar.
Pritet që kandidatët për deputetë të PD-së të mbajnë fjalime, që do të kulmojnë me fjalën e Lulzim Bashës.
Tubimi ka nisur në orën 17:00 dhe do të zgjasë 45 minuta. Kënga e zgjedhur e fushatës është “Unstoppable” e Sias.
Pas përfundimit të tubimit elektoral të PD, pak minuta më vonë rreth orës 18:00 pritet çelja nga ana e Partisë Socialiste, e cila do e zhvillojë tubimin në sheshin “Skënderbej”.
Edhe pse në kushte pandemie, kjo nuk i ka penguar simpatizantët demokratë të jenë pjesëmarrës në takim e sotëm të hapjes së fushatës elektorale.
Në tubimin e sotëm vihet re një detaj i ri. Një pjesë e simpatizantëve në shesh kanë ardhur me makina, ndërsa pjesa tjetër është grumbulluar para podiumit ku pritet të mbahen dhe fjalimet.
Në fotot që vijnë nga sheshi, gjithashtu vihet re një gjetje nga ana e PD. Bëhet fjalë për disa rrathë në të cilët do të lejohen vetëm 10 persona, duke u bazuar dhe në rregullat e pandemisë të vendosura nga Komiteti i Ekspertëve. Por pavarësisht këtyre masave, shihet një mbipopullim i sheshit.
