Policia Kufitare e Korçës ka finalizuar me sukses operacionin e koduar “Lugina 2”, duke zbuluar dhe goditur një tjetër rast të ndihmës për kalim të paligjshëm të kufirit, kundrejt shpërblimit financiar.
Në kuadër të këtij operacioni u arrestua në flagrancë shtetasi sirian Muhamed Hamad, 18 vjeç, i cili u kap gjatë natës në fshatin Vidohovë, teksa po shoqëronte gjashtë emigrantë të ardhur nga Egjipti dhe Siria, mes tyre katër të mitur.
Sipas hetimeve, Hamad kishte ngritur një rrjet të organizuar për kalime të paligjshme të kufirit nga Greqia në Shqipëri, me synim kalimin e mëtejshëm në Mal të Zi dhe destinacion final vendet e Bashkimit Evropian.
Hetimet për aktivitetin e këtij shtetasi kishin nisur prej disa muajsh nga Drejtoria Vendore për Kufirin dhe Migracionin Korçë, në bashkëpunim me Stacionin e Policisë Kufitare Kapshticë dhe Prokurorinë pranë Gjykatës së Korçës, duke u mbështetur në të dhëna të inteligjencës policore.
Rezultatet e hetimeve zbuluan se i dyshuari kishte qenë i përfshirë në disa raste të mëparshme të ndihmës për kalime të paligjshme, të cilat ishin ndaluar nga strukturat e rendit.
Aktualisht, hetimet vijojnë për të dokumentuar në mënyrë të plotë veprimtarinë kriminale dhe për të identifikuar persona të tjerë të përfshirë në këtë rrjet.
Materialet procedurale i janë referuar Prokurorisë së Juridiksionit të Përgjithshëm në Korçë për veprime të mëtejshme ligjore.
