Kryeministri Edi Rama ka nderuar me “Yllin e Madh të Medaljes për Mirënjohje Publike” Gjeneralin Major Abass Ibrahim.
Rama tha se gjenerali ndihmoi në shpërimin e fëmijëve dhe grave nga kampet e luftës në Shqipëri, dhe në veçanti përmendi operacionin për shpëtimin e Alvin Berishës nga kampi “Al-Hol”.
“Përshëndetje të gjithëve. Sot jemi këtu për të nderuar një mik në ditë të vështira, i cili me shumë përkushtim na ka ndihmuar në mënyrë të pakursyer për të shpëtuar fëmijë dhe gra fatkeqe nga kthetrat e ferrit në kampet e luftës në Siri. Siç thoshte poetja amerikane Maya Angelou; ‘hero është ai që ka si qëllim që të bëjë botën një vend më të mirë për të gjithë’. S’ka përshkrim më të saktë për gjeneralin Abass Ibrahim i cili është me ne sot këtu dhe dua ta falënderoj, se sa fjalët e poetes. Në operacionet e zhvilluara në tre vitet e fundit, ku plot fëmijë dhe gra janë nxjerrë nga ferri i Al-Holit dhe jo vetëm, gjenerali ka qenë pika jonë e referimit, krahu ynë i zgjatur drejt atyre fëmijëve dhe grave. Ka qenë shqiptari më i mirë, i papërtuar, i pa kursyer dhe pas asnjë interes tjetër, përveç interesit human për të nxjerrë nga ferri njerëz fatkeq. Besoj ju kujtohet të gjithëve operacioni i jashtëzakonshëm i Alvinit, djali që u në simbol i solidariteti të dhjetra mijërave shqiptarë këtu për ta shpëtuar. Ai operacion u kurorëzua me sukses falë gjeneralit, që e kemi sot këtu për ta nderuar”, u shpreh Rama.
Ndërkohë, në fjalën e tij gjenerali u shpreh i nderuar që ndodhet në Shqipëri, një vend që ruan të drejtat e qytetarëve të tij. Gjeneral Ibrahimi tha se edhe Shqipëria, si shumica e vendeve, ka vuajtur nga katastrofa e terrorizmit në botë.
“Profeti Muhamed thotë se kush shpëton një shpirt, një njeri shpëton njerëzimin. Jam i nderuar që gjendem këtu në një tokë, përballë djemve e vajzave të tij, një vend që ruan të drejtat e qytetarëve të tij. Është një nder të marr pjesë në këtë ceremoni për vlerën e lirisë. Shqipëria si shumica e njerëzve ka vuajtur nga katastrofa e terrorizmit në botë. Shqipëria si shoqëri ka paguar një çmim të lartë gjatë 2-3 viteve kur gra e fëmijë u morën”, tha Gjenerali Major.
