Presidenti i Serbisë, Aleksandër Vuçiç, ishte në Tiranë katër ditë më parë për të marrë pjesë në Samitin e Komunitetit Politik Evropian.
Pas këtij takimi, ai foli në një tubim të partisë së tij në Nish, ku përmendi kryeqytetin shqiptar me një mesazh të veçantë për trajnerin e kombëtares serbe të futbollit, Dragan Stojkoviç Piksi.
Vuçiç e falenderoi Stojkoviç për mbështetjen dhe i kërkoi që kur të zhvillojnë ndeshjen në Tiranë, të bëjnë çmos për ta mposhtur ekipin shqiptar.
“E pashë pak më parë dhe tani që është këtu, ju lutem duartrokitni trajnerin serb Dragan Stojkoviç Piksi, një legjendë nga Nishi, i cili nuk u fsheh dhe erdhi të jetë me ne sonte. Në qershor apo korrik do të luani atje kundër Shqipërisë, për t’i mundur ata,” tha Vuçiç.
Shqipëria dhe Serbia ndodhen në Grupin K të kualifikueseve për Kupën e Botës 2026, dhe pritet një përballje e fortë mes dy ekipeve, duke pasur parasysh tensionet e ndeshjes së fundit në vitin 2016.
Takimi i radhës në stadiumin Air Albania është caktuar për më 7 qershor 2025 në orën 20:45 dhe do të zhvillohet pa praninë e tifozëve serbë.
