Trajneri i Kombëtares shqiptare, Silvinho, komentoi zgjedhjet e bëra për listën e lojtarëve që do të përfaqësojnë Shqipërinë në ndeshjet kualifikuese për Kupën e Botës 2026 ndaj Serbisë dhe Letonisë.
Tekniku brazilian theksoi se shumë prej futbollistëve sapo kanë mbyllur sezonin dhe mund të ndihen të lodhur, ndërsa disa të tjerë kanë pushuar që më herët.
Ai u shpreh optimist për përgatitjet, duke theksuar se ka 10 ditë për të punuar intensivisht me ekipin para takimeve të rëndësishme.
“Është një periudhë specifike e sezonit. Disa lojtarë sapo e kanë përfunduar sezonin dhe janë të lodhur, ndërsa të tjerët kanë qenë me pushim më herët. Kemi 10 ditë për t’u përgatitur mirë,” tha Silvinho.
Trajneri foli edhe për sfidën ndaj Serbisë, duke e cilësuar atë një ndeshje me një ngarkesë të veçantë emocionale, por me fokusin kryesor te loja dhe identiteti i skuadrës shqiptare.
“Janë dy takime të vështira, me kundërshtarë fizikisht të fortë. Më duhet të mbështetem te të 27 lojtarët e thirrur dhe të fokusohemi në punën tonë. Ndeshja me Serbinë ka një histori të veçantë, por ne duhet të tregojmë atë futboll që duam. Luajmë me zemër dhe kemi një identitet të qartë,” shtoi ai.
Shqipëria do të presë Serbinë më 7 qershor në “Arenën Kombëtare” me fillim në orën 20:45, ndërsa tri ditë më vonë, më 10 qershor, do të luajë ndaj Letonisë në “Skonto Stadions” në orën 20:45.
Silvinho theksoi edhe rëndësinë e përgatitjeve për ndeshjen ndaj Serbisë dhe kërkoi përkushtim maksimal nga lojtarët, duke u shprehur se pavarësisht rivalitetit dhe historisë, Shqipëria do të luajë me shpirt dhe përqendrim.
“E di që kjo ndeshje ka rëndësi të veçantë. Kundërshtarët janë shumë të fortë fizikisht dhe kanë lojtarë me eksperiencë. Por ne do të bëjmë lojën tonë dhe do të japim gjithçka në fushë,” tha trajneri.
Ai shtoi se shanset e kualifikimit për në Botëror do të bëhen më të qarta në muajt tetor dhe nëntor, por që tani duhet të përqendrohen në marrjen e pikëve në takimet e ardhshme.
“Duhet të marrim pikë nga këto ndeshje. Në fund të vitit do të dimë më shumë për shanset tona. Ndërkohë, kërkoj nga lojtarët që të luajnë me zemër dhe të përpiqen për rezultatin më të mirë,” përfundoi Silvinho.
