Ka shkuar në 3 numri i viktimave nga COVID-19 në Kosovë.
Ministria e Shëndetësisë në Kosovë bën me dije, se dy persona kanë ndërruar jetë mëngjesin e sotëm.
Mësohet se viktimat kishin sëmundje bashkëshoqëruese, si diabet dhe hipertension.
“Sot me datë 06.04.2020 në Klinikën Infektive të QKUK-së dy pacientë me COVID 19 kanë përfunduar me vdekje. Në ora 03:00 ka përfunduar me vdekje pacienti i gjinise mashkull S. N, 1961, Prishtinë, i cili është pranuar në Mjekimin Intenziv të Klinikës Infektive me datën 04. 04. 2020 transfer nga Qendra Emergjente e QKUK-së dhe ka qenë me sëmundje shoqëruese (Diabetes Mellitus tip 2. Sy hepatorenale). Pacienti është pranuar në Klinikën Infektive në gjendje të rendë pa vetëdije. Në ora 07:10 ka përfunduar me vdekje pacientja e gjinisë femer, N. R, 1950, Korishë, Prizren, e cila është pranuar po ashtu në Mjekimin Intenziv të Klinikës Infektive me datën 02. 04.2020 dhe ka pasur sëmundje shoqëruese (Diabetes Mellitus, Nephropathia diabetica, Hypertensio arterialis dhe Cardimyopathia chronica)”, thuhet në njoftimin e MSH-së.
Në total numri i të prekurve nga COVID-19 në Kosovë ka shkuar në 145, nga të cilët 23 janë shëruar dhe tre kanë ndërruar jetë.
Që prej fillimit të epidemisë, në Kosovë janë kryer 1964 teste.
