Kinematografia shqiptare humbi një nga ikonat e saj më të mëdha. Margarita Xhepa, aktorja e njohur e skenës dhe ekranit, u nda nga jeta në moshën 93-vjeçare, vetëm një ditë pas ditëlindjes së saj.
E lindur më 2 prill 1934 në Lushnjë, Xhepa nisi rrugëtimin e saj artistik që në moshë të re, duke lënë gjurmë të pashlyeshme në teatrin dhe kinemanë shqiptare.
Gjatë një karriere të gjatë dhe të pasur, ajo interpretoi mbi 150 role në teatër dhe 32 role në kinematografi.
Përveç suksesit të madh me dramaturgjinë shqiptare, Xhepa shkëlqeu edhe në interpretimin e veprave të mëdha botërore, duke sjellë në skenë figura si Ofelia në Hamleti, vajzën e dytë në Mbreti Lir, dadoja në Romeo e Zhuljeta dhe mbretëresha Margaret në Rikardi III.
Në vitin 1997, ajo u bë pjesë e filmit grek Mirupafshim, i cili u vlerësua me Çmimin e Madh në Festivalin Ndërkombëtar të Filmit Mesdhetar në Selanik, ndërsa Margarita Xhepa mori Çmimin e Nderit për interpretimin e saj.
Në vitin 2007, ajo u nderua me Çmimin e Karrierës për rolin e Nadjezhnës në monodramën Kënga e mjellmës të Anton Çehovit.
Në kinematografi, Xhepa u bë e njohur për një sërë rolesh ikonike, mes të cilave Zyraka në Vitet e para (1965), Shano në Dimri i fundit (1976), pianistja në Koncert në vitin 1936 (1978) dhe Lena në Tokë e përgjakur (1976).
Me ndarjen e saj nga jeta, arti shqiptar humbi një prej figurave më të ndritura, por trashëgimia e saj do të mbetet e pavdekshme për brezat që vijnë.
