Pas ikjes nga jeta të ish-kryeministrit Bashkim Fino, Edi Rama e ka shpallur 29 marsin ditë zie kombëtare. Lajmi është njoftuar nga kryeministri Rama me anë të postimit të një fotoje në rrjetet sociale.
Këtë të hënë pritet që në të gjitha instuticionet shtetërore dhe publike të ulet flamuri kombëtar në gjysmë shtizë.
Lidhur me ngjarjen e trishtë, u njoftua dhe për zhvillimin e homazheve që pritet të mbahen në orën 12:00 deri në 16:00 në mjediset e Pallatit të Kongreseve.
Reagimet dhe mesazhet e ngushëllimit kanë qenë të shumta nga kolegë deputetë e politikanë shqiptar, të cilët e kanë cilësuar një humbje kombëtare dhe një ndarje të parakohshme nga jeta.
Kujtojmë se Bashkim Fino ka qenë Kryeministër i Shqipërisë prej 9 mars 1997 deri më 29 qershor 1997. Kreu studimet e larta në Universitetin e Tiranës, Fakulteti Ekonomik, dega Financë. Në vitin 1992, Z. Fino u zgjodh Kryetar i Bashkisë Gjirokastër, post të cilin e mbajti deri në vitin 1996.
Karriera e tij politike në Partinë Socialiste është e hershme. Prej vitit 1997 e në vazhdim ishte anëtar i Kryesisë së Partisë Socialiste. Kulmi i karrierës së tij do të shënohej në vitin 1997, ku do të zgjidhej Kryeministër i vendit në qeverinë e Pajtimit Kombëtar, post që do ta mbante nga muaji mars deri në korrik. Z. Fino ka mbajtur disa poste ministrore.
Nga viti 1997 deri në 1998 ushtroi detyrën e Ministrit të Pushtetit Lokal, njëkohësisht dhe Zv/kryeministër. Në 1999 deri në vitin 2001 do të ishte ministër i pushtetit lokal. Gjatë viteve 2001-2002 ka qenë Ministër i Punëve Publike dhe Turizmit.
