Ka ndërruar jetë 22-vjeçari që u përfshi në aksidentin e rëndë të ndodhur më 6 shtator në Fushë-Dukat, në aksin rrugor Orikum–Himarë. I riu, i plagosur rëndë në përplasjen mes dy automjeteve, kishte qëndruar për më shumë se një muaj në kujdesin intensiv të Spitalit të Traumës në Tiranë, por nuk arriti të mbijetonte për shkak të komplikacioneve të shumta.
Burime nga familjarët kanë bërë të ditur se pas daljes nga spitali, gjendja e tij shëndetësore u përkeqësua ndjeshëm. Ai zhvilloi infeksione serioze në plagët e hapura, të cilat sollën përhapje të infeksionit dhe kolaps të organeve vitale. Edhe pse u transportua sërish drejt Spitalit të Traumës dhe iu nënshtrua ndërhyrjes urgjente, mjekët nuk arritën ta shpëtonin jetën e tij.
Aksidenti ndodhi rreth orës 01:30 të natës së 6 shtatorit, kur një automjet tip “Audi”, që drejtohej nga 22-vjeçari Fadil Bodo, u përplas me një “Fiat” të drejtuar nga 20-vjeçari Gabriel Lazemetaj. Si pasojë e përplasjes u plagosën katër persona, mes tyre edhe viktima, i cili ndërroi jetë disa javë më vonë.
Në njoftimin e Policisë së Vlorës të datës 6 shtator thuhej:
“Rreth orës 01:30, në aksin rrugor Orikum–Himarë, automjeti tip ‘Audi’, që drejtohej nga shtetasi F. B., 22 vjeç, është përplasur me automjetin tip ‘Fiat’ me drejtues shtetasin G. L., 20 vjeç. Si pasojë e aksidentit kanë mbetur të plagosur dy drejtuesit dhe dy pasagjerët e ‘Audit’, shtetasit F. Q. dhe D. K. Ky i fundit u transportua në Spitalin e Traumës për ndihmë mjekësore të specializuar.”
Sipas të dhënave paraprake, përplasja dyshohet se ka ndodhur për shkak të shpejtësisë së lartë dhe humbjes së kontrollit nga një prej automjeteve. Policia dhe Prokuroria e Vlorës vijojnë hetimet për të përcaktuar përgjegjësitë dhe rrethanat e plota të ngjarjes që i mori jetën një 22-vjeçari.
