Prej disa ditësh, mijëra klientë të Bankës Kombëtare Tregtare (BKT), kanë ngelur pa kryer shumicën e veprimeve bankare, për shkak të problemeve që ka pësuar sistemi qëndror i saj. Problematika ka bërë që BKT të njoftojë klientët përmes një postimi në “Facebook” se për shkak të disa probleme teknike, nuk është në gjendje të ofrojë një pjesë të shërbimeve për klientët.
“Të nderuar klientë! Ju njoftojmë se për shkak të disa problemeve teknike në sistemin tonë “Qendror Bankar”, kemi ndërprerje në disa shërbimeve bankare. Ekipet e IT dhe partnerët tanë globalë po bëjnë të gjitha përpjekjet për të zgjidhur problemin sa më shpejt që të jetë e mundur”, shkruhej në njoftimin e BKT-së. Ky njoftim, u bë pak minuta më parë.
Ndërsa në orën 9 të mëngjesit të sotëm, BKT njoftoi: “Problemi hardware që shkaktoi një ndërprerje afatshkurtër në sistemin tonë bankar është zgjidhur. ATM -të dhe POS-et tona kanë filluar të shërbejnë, kanalet tona digjitale dhe transaksionet e degëve do të vihen gradualisht në shërbim sot rreth orës 11 të mëngjesit pas kontrolleve përfundimtare që do të kryhen. I gjithë ekipi ynë po punon me përkushtimin e zakonshëm për t’ju shërbyer sa më mirë”. Por, sistemi ende nuk është vënë në zbatim, edhe pse kanë kaluar më shumë se 3 orë.
