Policia e Vlorës ka përfunduar operacionin “The Accountant”, duke zbuluar një rast të ndërhyrjes të paautorizuar në sistemet kompjuterike të disa institucioneve shtetërore.
Autor i dyshuar është një 15-vjeçar nga Vlora, i cili, sipas hetimeve, ka ndërhyrë në të dhënat kompjuterike të institucioneve shtetërore gjatë muajit mars 2025.
Ai ka aksesuar email-et dhe faqet zyrtare, duke shkaktuar ndërprerje të funksionimit të tyre për disa periudha kohore.
Megjithatë, autoritetet konfirmojnë se nuk ka pasur vjedhje të të dhënave apo dokumenteve konfidenciale.
Gjatë operacionit, policia ka sekuestruar disa pajisje elektronike, përfshirë 5 laptopë, 6 telefona celularë dhe 1 dron, të cilat do t’i nënshtrohen analizave të mëtejshme.
Hetimet vazhdojnë për të dokumentuar aktivitetin e kundërligjshëm dhe për të zbuluar nëse ka të tjerë të përfshirë në këtë ngjarje.