Policia e Rinasit ka ndaluar një të ri, për mosdeklarim të parave.
Bëhet fjalë për 27-vjeçarin me iniciale F.K., banues në Durrës.
Atij iu gjetën 20 mijë euro të padeklaruara në doganë.
Paratë i riu i kishte fshehur në çantën e shpinës.
Materialet procedurale i kaluan prokurorisë për veprime të mëtejshme.
Njoftimi i policisë
Rinas
Policia Kufitare e Rinasit parandalon një rast të transfertës së parave jashtë shtetit, në mënyrë të kundërligjshme.
Evidentimi, si rezultat i masave të shtuara, në zbatim të planit të masave për parandalimin dhe goditjen e paligjshmërisë.
Sekuestrohen 20000 euro, procedohet penalisht një 27-vjeçar.
Shërbimet e Policisë Kufitare të Rinasit, në dalje të RSH-së, gjatë kontrolleve të ushtruara kanë përzgjedhur për kontroll në vijën e dytë, shtetasin F. K., 27 vjeç, banues në Durrës.
Gjatë kontrollit të ushtruar, shtetasit të lartpërmendur iu gjet në çantën e shpinës shuma monetare prej 20000 eurosh, që ishte e padeklaruar në doganë.
Në përfundim të veprimeve të para hetimore të kryera nga specialistët e Policisë Kufitare në Rinas, materialet në ngarkim të këtij shtetasi i kaluan prokurorisë, për veprime të mëtejshme, për veprën penale “Mosdeklarim i vlerave monetare në kufi”.
