Kreu i Kuvendit, Gramoz Ruçi këtë të hënë ka komentuar vendimin nqë u morë disa ditë më parë për të përjashtuar gazetarët nga transmetimi i pavarur i punimeve të Kuvendit dhe Komisioneve Parlamentare.
Në fjalën e tij, Ruçi tha se vendimi hyn në fuqi kur të përfundojnë masat e marra nga pandemia e koronavirusit, ndërsa shtoi se çështja do të diskutohet më me detaje në parlamentin e ardhshëm. Në këtë të fundit, ai njoftoi se nuk do të jetë pjesë pasi nuk do të jetë më pjesë e politikës aktive.
“Është vendim që hyn në fuqi kur të mbarojnë masat anti-COVID. Të bëhet objekt diskutimi në parlamentin e ardhshëm. Shqetësimi është vlerësuar maksimalisht, është zhvilluar takim me ta. Po priten konkluzionet e tyre. Nëse ka gjëra që nuk shkojnë do të konsiderohen nga Kuvendi,”-tha Ruçi.
Por çfarë parashikon vendimi? Më 4 qershor, Kuvendi i Shqipërisë publikoi vendimin që përjashton gazetarët nga transmetimi i pavarur i punimeve të Kuvendit dhe Komisioneve Parlamentare. Ky vendim mban firmën e kryeparlamentarit Gramoz Ruçi dhe synon që ti “akomodojë” gazetarët në një zyrë, ku do të ndjekin përmes ekraneve dixhitale punimet e Komisioneve. Vendimi bie ndesh me të drejtën e raportimit dhe transparencën që zyrtarët e lartë kanë për detyrim t’ju japin qytetarëve.
