Komuniteti i futbollit në Shqipëri po përjeton një ditë të trishtuar pas lajmit të ndarjes nga jeta të Bejkush Birçes, një prej figurave më të rëndësishme në historinë e futbollit shqiptar. Birçe, i cili shërbeu si lojtar, trajner dhe më vonë edhe si zëvendëspresident i Federatës Shqiptare të Futbollit (FSHF), ndërroi jetë pas një periudhe të gjatë sëmundje.
Gjatë karrierës së tij, Birçe luajti për skuadrën e Partizanit dhe më pas u bë trajner i disa prej klubeve më të njohura në vend, përfshirë Naftëtarin, Flamurtarin, Lokomotivën e Durrësit dhe Dinamon. Ai është mbajtur mend sidomos për kontributin e tij si trajner i Kombëtares shqiptare gjatë viteve ’90, një periudhë e vështirë për vendin në aspekte të ndryshme.
FSHF ka shprehur ngushëllimet e saj ndaj familjes së Birçes dhe të afërmve, duke theksuar ndikimin e tij të jashtëzakonshëm në futbollin shqiptar. Po ashtu, Presidenti i FSHF-së, Armand Duka, ka bërë një postim në rrjetet sociale ku shprehet i pikëlluar për këtë humbje. “Kemi humbur një nga njerëzit me më shumë kontribute në futbollin shqiptar, si lojtar, trajner e drejtues në FSHF. Kemi humbur një njeri me karakter të fortë, një mik dhe një familjar shumë të mirë,” shkroi Duka.
Homazhet për Bejkush Birçen do të zhvillohen ditën e hënë në ambientet e stadiumit “Air Albania”, nga ora 11:00.
