Sot është një ditë e trishtë për median shqiptare, pasi raportohet për ndarjen nga jeta të gazetares së kronikës, Sonila Mesareja.
Sipas njoftimit të publikuar nga Unioni i Gazetarëve Shqiptarë, Sonila ndërroi jetë pas një sëmundjeje të rëndë.
Ajo punoi prej vitesh si reportere e kronikës në disa redaksi të shtypit të shkruar dhe në shume projekte që synuan një gazetari cilësore.
“Sonila ishte kolege e dashur, model i këmbënguljes dhe një profesioniste që modestine e kishte virtyt, ndërsa kurajën dhe durimin i mbartte si vlera njerëzore, që i shtonin besimin tek lexuesi dhe komuniteti i gazetarëve. Ajo shërbeu në redaksitë e shtypit të shkruar si profesioniste e heshtur dhe me kujdesin për të ruajtur vlerat dhe cilësitë e larta njerëzore, duke fituar respekt e miqësi të të gjithë stafeve e kolegëve me të cilët punoi.
Ndarja nga jeta e Sonilës lë hapur dhimbjen e ikjes së parakohshme dhe kujtimin e vyer të një kolegeje, që nuk do te harrohet kurrë. Sonila ishte ndër nismetaret e organizimeve themeluese të Unionit të Gazetareve Shqiptare dhe një kolege që nuk nguroi asnjëherë së qeni pjesë e nismave dhe reagimeve rregulluese në jetën tonë profesionale.
U prehsh në paqe kolegia jone e dashur! E paharruar do të jesh për të gjithë ne anëtaret e Unionit të Gazetarëve Shqiptare dhe komunitetin e gjerë të gazetarëve! Ngushëllime familjes”, shkruhet në postimin e publikuar në “Facebook” nga unioni.
