Ministrat e Mbrojtjes të vendeve të përfshira në Grupin e Kontaktit për Ukrainën u mblodhën më 4 qershor në selinë e NATO-s në Bruksel, në një takim në kuadër të “formatit Ramstein”.
Qëllimi i takimit ishte forcimi i mbështetjes për Ukrainën në përballjen me agresionin rus, ndërkohë që luftimet në terren mbeten të ashpra.
Takimi u thirr me iniciativën e ministrit gjerman të Mbrojtjes, Boris Pistorius, dhe atij britanik, John Healey, dhe pritet që në të të marrë pjesë edhe ministri ukrainas i Mbrojtjes, Rustem Umyerov.
Megjithatë, ministri amerikan i Mbrojtjes, Pete Hegseth, do të mungojë në këtë takim, por do të jetë i pranishëm në mbledhjen e ministrave të mbrojtjes të NATO-s që zhvillohet më 5 qershor.
Ndërkohë, NATO ka konfirmuar se Ukraina është ftuar të marrë pjesë në samitin e ardhshëm të liderëve të Aleancës, që do të mbahet në fund të qershorit në Hagë.
Detajet e axhendës pritet të bëhen publike në ditët në vijim. Presidenti ukrainas Volodymyr Zelensky ka marrë pjesë në samitet e mëparshme të NATO-s në Vilnius dhe Uashington, ndërsa pjesëmarrja e tij në Hagë ishte subjekt diskutimesh deri më tani.
Në të njëjtën ditë, Komisioni Evropian pritet të paraqesë një plan të ri për trajtimin e çështjes së refugjatëve ukrainas në BE.
Komisioneri Magnus Brunner dhe zëvendëskryeministri ukrainas Oleksiy Hernishov do të prezantojnë së bashku draftin në Bruksel.
