Ditët e fundit është parë një rritje e ndjeshme e numrit të rasteve ditore me koronavirus, ndoshta edhe për shkak të përhapjes së variantit të ri “Delta”. Ajo që është vënë re është shtimi i pacientëve të shtruar në Spitalin Infektiv. Në një intervistë për Klan, shefja e Infektivit, Najada Çomo ka treguar se në spitale janë kthyer edhe rastet e rënda në terapi intensive. Çomo ka thënë se aktualisht në spital janë 38 pacintë të shtruar dhe ka theksuar se disa prej tyre janë në gjendje kritike për jetën.
“Numri i pacienteve nga rifillimi i shtimit të rasteve, ka qenë rreth 86, sot kemi rreth 38 pacientë. Kemi pacientë në gjendje kritike, në terapi intensive, kemi në gjendje të mesme, të renë dhe kritike që janë nën ventilim mekanik”, ka thënë ajo.
Ndër të tjera ajo ka theksuar se të shtruarit në spital i përkasin moshave nga 21 vjeç që është më e reja deri në 82 vjeç.
“Nga 21 vjeç që është më e re deri në 82-vjeçare, ato mosha të reja janë persona që kanë bërë komplikacione nuk janë në situatë të rënduar, grup mosha që zë peshën më të madhe është 60-75 vjeçare”, tha Çomo.
Po ashtu ajo ka theksuar se mosvaksinimi ka ndikuar në zhvillimin e sëmundjes së COVID-19, tek disa pacientë të cilët kanë dashur trjatim më të specializuar në spital. Çomo thotë se disa pacientë që kanë bërë vetëm një dozë të vaksinës dhe janë infektuar me COVID-19, kanë dalë në gjendje të mirë nga spitali. Po ashtu ajo ka thënë se procesi i vaksinimit masiv ka dhënë efektet e veta pozitive, duke krijuar një situatë të qëndrueshme të pandemisë.
“Në grupin e pacientëve të shtruar ka pasur dhe nga ata që ishin të vaksinuar me një dozë, dhe pjesa më e madhe kanë dalë në gjendje të mire nga spitali dhe situata është përmirësuar në një kohë të shkurtër. Krahasuar me vjet diferenca është e madhe dhe peshën në uljen e numrit të rasteve e zë procesi i vaksinimit”, tha mjekja.
Gjithashtu ajo iu ka bërë thirrje të gjithë personave që janë mbi moshën 18-vjeç, që të marrin vaksinën.
