Naftëtarët e Ballshit që gjenden në ditën e 9-të të grevës së urisë, kanë reaguar pas deklaratave të Edi Ramës.
Sot, kryeministri shprehej se nuk ka faj për atë që po ndodh mes kompanisë që ka privatizuar rafinerisë dhe punëtorëve. Ai shprehej se ishte shqetësuar për ta, sa që kishte takuar dhe presidentin e Azerbajxhanit, ku edhe një bankë vendase e ka privatizuar.
Naftëtarët kanë reaguar, dhe e kanë quajtur këtë deklaratë të Ramës sa për të larë gojën. Sipas tyre, Ramës i intereson bllokimi i punës në rafineri, sepse kështu janë interesat e oligarkut Shefqet Kastrati për të shitur në treg naftën që importon.
Postimi i plotë i naftëtarëve:
Për herë të parë sot – pas protestave të vazhdueshme në ndërmarrjen e rafinerisë së Ballshit, pas protestave në bashkinë e Fierit, pas protestës së naftëtarëve në Tiranë që u shtyp me dhunë nga policia, dhe pas një greve urie 9-ditore që po rrezikon jetët tona – Edi Rama denjoi të flasë për naftëtarët. Edhe këtë herë që denjoi të flasë, e bëri vetëm për të larë gojën duke thënë se kjo është marrëdhënie mes punëtorëve dhe kompanisë private dhe se fajin për kushtet ku ndodhen punëtorët e ka qeveria e shkuar që ndërmori privatizimin e rafinerisë. E megjithëse privatizimi i rafinerisë ishte me të vërtetë shkatërrimtar – ashtu siç ka rezultuar çdo privatizim i aseteve publike deri më sot – Edi Rama nuk flet për përgjegjësinë që ka si drejtues i shtetit shqiptar. Nuk flet për faktin se sektori i nxjerrjes dhe përpunimit të naftës është cilësuar si sektor strategjik i rëndësisë së veçantë kombëtare, e prandaj përgjegjësia nuk mund t’i lihet vetëm atij që e ka privatizuar. Nuk flet për faktin se naftëtarët kanë 24 paga pa marrë, se për këtë ka dalë një vendim gjykate i formës së prerë i cili e ka vënë rafinerinë nën sekuestro dhe se qeveria e Edi Ramës pengon zbatimin e vendimit të gjykatës. Nuk flet për faktin se e gjithë nafta që qarkullon në tregun shqiptar është naftë e importuar, ndërsa e gjithë nafta që nxirret në vend tregtohet jashtë, në vend se të përpunohej në rafineri e të dilte me kosto më të ulët. Nuk flet as për interesat që ka oligarku Shefqet Kastrati në bllokimin e punës në rafineri për të shitur në treg naftën që importon nga jashtë.Për këto gjëra Edi Rama nuk dëgjon, nuk sheh dhe nuk flet. Për këto gjëra Edi Rama hesht me një heshtje vrastare për naftëtarët, familjet e tyre, banorët e Ballshit dhe të gjithë Shqipërisë. Naftëtarët janë të vendosur të mos dorëzohen derisa të vihet e drejta në vend.
/GazetaReforma.com/
