Dje ishte Pano Soko ai i cili përmes një videoje tregoi se prej 1 muaji në vendin tonë nuk kishte ndryshuar çmimi i naftës dhe i gazit, edhe pse në bursat ndërkombëtare ka pësuar rënien më të ulët në 4 muajt e fundit.
Ndërsa, ditën e sotme ishte partia “Nisma Thurje”, e cila përmes një kërkese i është drejtuar Autoritetit të Konkurrencës për t’i kërkuar nisjen e hetimit për çmimin e naftës dhe të gazit në tregun e pakicës. Sipas Nismës kjo është një marrëveshje kartel, për të cilën kanë rënë dakord qeveria dhe tregtarët e naftës që të fiksojnë një çmim për një periudhë kohë, pavarësisht luahjeve që ka tregu i karbureve.
Nisma Thurje në kërkesë shprehet se Autoriteti i Konkurrencës është i vetmi institucion i cili autoritetin për ta ndëshkuar këtë marrëveshje kartel. Mes të tjerash thuhet se “Institucioni tjetër është Prokuroria, pasi kjo praktikë përbën edhe vepër penale.”
Mirëpo, Autoriteti i Konkurrencës deri më tani nuk ka reaguar lidhur me çmimin që ka nafta dhe gazi në vendin tonë, duke mos dhënë asnjë shpjegim se çfarë po ndodh në treg, edhe pse shërben pikërisht për të kontrolluar tregun e konkurrencës mes atyre që tregëtojnë në këtë rast naftën dhe gazin.
