Së shpejti në Parlament pritet që të votohet edhe kryetari i ri i Autoritetit të Medias Audiovizive (AMA), një nga kandidatet për këtë post është edhe Armela Krasniqi. Deputeti Myslim Murrizi, gjatë fjalës që mbajti ditën e sotme nga foltorja e Kuvendit e ka përmendur Krasniqin si një nga emrat e zgjedhur për në krye të AMA-s.
Ndër të tjera ai ka thënë se Armela Krasniqi, është nusja e djalit të teze së Lulzim Bashës, duke aluduar kështu se PD-ja dhe PS-ja po bashkëpunojnë bashkë.
“Sot në këtë Kuvend nusja e djalit të tezës së Lulzim Bashës do të zgjidhet në krye të AMA-s. Ju e keni pasur në kryeministri dhe tashmë do ta zgjidhni kryetare të AMA-s. Ju jeni një, edhe më herët e kam thënë, kur jeni ju në pushtet sa mirë i bëni letrat për të ndarë tenderat, ashtu sikurse dhe kur ata janë në pushtet i bëjnë shumë mirë letrat për të ndarë tenderat”, tha deputeti Myslim Murrizi, nga foltorja e Kuvendit.
Murrizi ka thënë se ka ardhur koha që të ngushtohet numri i atyre subjekteve për të cilat ligji duhet të ngarkojë në mënyrë të detyrueshme të deklarojnë pasuritë e tyre.
Ndër të tjera ai tha se objekt i ILDKP duhet të jenë të gjithë deputetët dhe drejtorët, të cilët duhet të justifikojnë pasurinë. Murrizi ka theksuar se duhet të verifikohen dhe jo thjesht të kalojnë si disa letra formale.
“Ka ardhur koha të shihet realisht që të ngushtohet numri i atyre subjekteve për të cilët ligji duhet të ngarkojë në mënyrë të detyrueshme të deklarojnë pasuritë. Janë sot 3 mijë e 769 subjekte, për mua janë shumë, në një Inspektoriat e numër të kufizuar inspektorësh dhe administrate, çfarë kërkoj apo shoh të udhës t’ia parashtroj drejtueses së ILDKP, objekt i hetimit të pasurisë nga ky institucion duhet të jenë banorët e kësaj salle, 140 deputetë, 60 kryebashkiakë, trupa gjyqësore po e kalon nga vetingu, ministrat, drejtorët e përgjithshëm, drejtorë rajonalë.
Rreth 2 mijë. Por t’iu verifikohet, jo thjesht ca letra formale. Ka pasuri të pa verifikuara në letra, të verifikuara publikisht që hajdutllëku i atyre që kanë ushtruar pushtet, gjënë e vjedhur me arrogancë në çdo cep të Shqipërisë,” tha ai ndër të tjera.
