Deshifrimi i bisedave në aplikacionin “Matrix” nga Europol pritet të sjellë një valë të re zbardhjesh të ngjarjeve kriminale dhe arrestimesh.
Shqiptarët kanë qenë përdorues aktivë të këtij aplikacioni, siç ka dalë nga hetimet e fundit. Nuredin Dumani, i penduari që ka bashkëpunuar me SPAK, ka rrëfyer krimet dhe porositësit që kërkonin eliminimin e armiqve për shuma të mëdha.
Ai ka treguar se gjatë komunikimeve në “Matrix” me Suel Çelën, u informua për një kontratë për eliminimin e pronarit të shkollës Wilson për 150,000 euro.
Ardian Sufaj, një 40-vjeçar i arrestuar për trafik kokaine nga Amerika Latine, në një bisedë të zbardhur nga Anti-Mafia italiane, përmendi përdorimin e “Matrix”, duke thënë:
“Izraelitët janë 100% të koduar… kjo është një Matricë”. Gjithashtu, në një operacion tjetër të Anti-Mafias italiane në nëntor 2023, u zbuluan përdorues të aplikacionit për menaxhimin e trafikimit të drogës. Policia italiane sekuestruar 420 kg drogë dhe ka arrestuar disa individë në Itali dhe Shqipëri, përfshirë Ardian Korrikun, Jurgen Korrikun dhe Etleva Adamin.
“Korrierët përdornin celularë të enkriptuar me origjinë shqiptare, të pajisur me sistemin e mesazheve të çastit “Matrix” dhe përdorej për kujdesin për logjistikën dhe lëvizjen e sasive të mëdha të drogës” thuhej në komunikatë.
