Gjatë periudhës së pandemisë, shpesh na ka rënë që të dëgjojmë shumë njerëz që thonë se nuk kanë nevojë më për maskën pasi e kanë kaluar covidin.
Mirëpo kjo neglizhencë, përveçse rrezikon të tjerët, në radhë të parë dëmton dhe rrezikon shëndetin tuaj.
Sipas të gjithë studimeve deri më sot për covid-19, thuhet se ky virus nuk krijon imunitet dhe rreziku për tu rikthyer sërish në organizmin e një pacienti që e ka kaluar këtë sëmundje, është shumë i madh.
Mirëpo çfarë thonë epidemiologët për këtë fenomen?
Epidemiologia Rovena Daja i ka bërë apel qytetarëve që e kanë kaluar covid-19, që ta mbajnë maskën në mënyrë konstante për të parandaluar një riinfektim.
“Maska është barrierë mbrojtëse, që duhet përdorur si nga ata, që e kanë kaluar Covidin dhe e kanë me dokument faktin që janë negativizuar, ashtu dhe nga ata që nuk e kanë kaluar.
Kjo sepse është barrierë që na mbron nga Covidi dhe gjithë infeksionet që qarkullojnë. Personat që e kanë kaluar duhet ta mbajnë maskën, pasi ata nuk janë vaksinuar të gjithë ndaj viruseve të tjera dhe gripit. Maska duhet mbajtur edhe për të ndaluar një riinfektim”, është shprehur epidemiologia Daja.
Rastet e riinfektimit me covid-19 për një kohë të shkurtër, janë ende të pakta, por që është një fenomen që ndodh, pasi është një virus i ri që ende përmban shumë mistere dhe të panjohura në përbërjen e tij dhe efektet që jep në organizmin e njeriut.
Nga ana tjetër vendim i qeverisë që maska duhet të përdoret me detyrim nga të gjithë, vazhdon të mbetet në fuqi, si në të gjithë vendet evropiane dhe sipas direktivave të OBSH-së./Gazetareforma.com/
